(کابل ټکی کام، ۱۳۹۸، زمری ۲۶)
د ملګرو ملتونو امنيت شورا د هند او پاکستان تر منځ په لانجمنه پوله کشمير کې پر پيدا شوي وروستي وضعيت غونډه کړې.
رويټرز اژانس ليکي، چې دغه غونډه د بندو دروازو تر شاه ترسره شوې او د چین استازي کشمير کې وروستی وضعيت خطرناک بللی په خبره يې دواړه خواوې دې له کوم اقدام کولو ډډه وکړي.
دغه راز په امنيت شورا کې د هند استازي ويلي چې دا د هند کورنۍ مسئله ده، هند د کشمير ټولو هوکړو ته ژمن دی او باید پاکستان او هند يې په خپله حل کړي.
دغه راز په ملګرو ملتونو د پاکستان استازې مليحه لودي بيا د دغه غونډې هرکلی کړی په وينا يې امنيت شورا کې د کشمير پر مسئلې د هند هغه ادعا ردوي چې په وينا يې هغوی يې کورنۍ مسئله بولي.
هند روانه مياشت له خپل اساسي قانونه ۳۷۰ ماده ليرې کړه هغه چې کشمير ته يې ځانګړي اختيارات ورکړي و، هلته يې بيړنۍ حالت اعلان او زرګونه پوځيان يې ولېږل.
پاکستان د هند یاده پريکړه غندلې په غبرګون کې يې پولې ته زرګونه ځواکونه ليږلي او د دغه هيواد لومړي وزير عمران خان ويلي چې د کشمير پر موضوع به چوپ پاتې نه شي، کلک ځواب به ورکړي او په نړيوال دريځ به دغه موضوع راپورته کړي.
