کابل ټکی کام (جمعه ، ۸ وږی ، ۱۳۹۸ل)
امریکایي ځواکونو کندهار کې یو ملکي وګړی په ډزو وژلی او یو بل یې ټپي کړی دی.
یوې سرچینې د نوم نه ښودو په شرط رسنیو ته ویلي، چې تېره ورځ ناوخته بهرنیو ځواکونو د دامان ولسوالۍ اړوند عبدالله کلي کې هغه وخت د ملکي وګړو پر موټر ډزې وکړې چې د دوی موټریز کاروان ته نږدې شوی وو.
د سرچینې په وینا ډزو کې یو ملکی وګړی وژل شوی، اوبل سخت ټپي کړی دی چې روغتیایي وضعیت یې خراب ښودل سوی.
سرچینه زیاتوي چې تېره ورځ بهرنیو ځواکونو د ډنډ ولسوالۍ کلانتر سیمه کې یو ۱۳ کلن ماشوم په ټانګ وهلی او سخت ژوبل کړی يې دی.
کندهار کې مېشتو بهرنیو ځواکونو تر دې دمه په دې اړه څه نه دي ویلي، خو ولسي وګړو ددې پیښې دتائید ترڅنګ ژوره خواشیني ښودلې، اوددې قضیې دڅېړنې غوښتنه یې کړې.
