غورځنګ
دا چې اوس مهال امریکايان د مذاکراتو په ترڅ کې له افغانستانه له سوله ييزې لارې د خپلو عسکرو وتل غواړي، نو طالبانو هم هغې سولې ته غاړه ايښې په کومه کې چې د افغانانو خير او سوکالي نغښتې وي، نو د امریکا د خارجه وزارت له لوري زلمی خليلزاد د مذاکراتو د پلاوي د مشر په توګه وټاکل شو، او طالبانو هم خپل مذاکراتي ټيم د نوموړې پروسې د د پرمخ بيولو لپاره وټاکه.
مذاکرات که څه هم دا دی لسم پړاو ته ورسېدل او تر اوسه پورې يې لا څه درک هم نه لګېږي، خو بيا هم طالبانو د ښې او سوچه سولې لپاره په دومره اوږدو مذاکراتو کې هم ځانونه ژمن ثابت کړل او دا دی اوس چې ابله ورځ زلمي خليلزاد په کابل کې له طلوع نيوز سره د مذاکراتو اړوند مرکه هم کوله نو دا خبره يې تر خولې ووتله، چې طالبانو باندې چې مونږ پخوا ګومان کولو چې ګواکې دوی د پرديو لپاره جګړه کوي او د پرديو غلامان به مو بلل خو اوس له لسو مياشتو يا کم او زياتې مودې مذاکراتو راهيسې مې ايله وپېژندل چې طالبان خپلواک خلک دي او د هېڅ کوم هېواد لپاره خپله جګړه نه تر سره کوي.
خو له دې سره سره چې زلمی خليلزاد هم د طالبانو په اړه مثبت دريځ خاوند شو، مګر ټرمپ بيا هم مذبذب دی او بلکل په يوه خبره نه ودرېږي، له کومه وخته چې مذاکرات د برياليتوب په لوري روان دي، له هغه وخته ټرمپ مذبذبې خبرې کوي، کله کله وايي چې عسکر وباسم، کله نا کله وايي چې که عسکر وهم باسو نو استخباراتي کارکوونکي به مو په افغانستان کې موجود وي، چې دا دی د ټرمپ همدا دريځ په کابل کې د لسګونو امریکايي عسکرو د مرګ لامل وګرځېدلو، تقريباً د ټرمپ د دې ډول خبرو په جريان کې دا دی په دوو ورځو کې دا دريم خونړی بريد دی چې د لسګونو امریکايانو ژوند اخلي، يو يې هم د ګرين وېلېج بريد دی چې پکې لسګونه امریکايي افسران او نور خارجيان ووژل شول، دويم يې ننی د شش درک سرتېری بريد دی چې پکې درې لنډکروزر ډوله موټر له منځه لاړل او تقريباً دولس تنه امریکايان ووژل شول او څو تنه نور پکې ټپيان شول، له دې وروسته همدا نن ورځ په لوګر پادخاب شانه کې د موټر بم بريد په ترڅ کې زیات شمېر امریکايان ووژل شول. چې دغه ډول پېښې د ټرمپ د مذبذب دريځ او خبرو ځواب دی.
نو که چېرې امريکايان د خپلو دغو وژل شويو عسکرو انتقام اخيستل غواړي نو ټرمپ دې محاکمه کړي، ځکه چې د سولې خبرې ښې په درز کې روانې وي خو ټرمپ پکې ګډوډې خبرې وکړي نو طالبان بيا مجبور دي چې ټرمپ ته خپل زور وښيي او دغه ډول بريدونه تر سره کړي چې پکې په زيات شمېر عسکر ووژل شي.
نو په پای کې وايو چې امريکايان بايد ټرمپ محاکمه کړي تر څو سولې ته لا ښه لاره هواره شي.