کابل ټکی کام( پنجشنبه، ۱۴وږی، ۱۳۹۸)
د مصر د پخواني وفات شوي لومړني منتخب ولسمشر محمد مرسي کشری زوی د زړه د حملې له کبله په روغتون کې ساه ورکړې ده.
د عبدالله مرسي مشر ورور له اناتولیا خبري اژانس سره په خبرو کې ویلي چې د دوی کشری ورور عبدالله مرسي د زړه د ناڅاپه حملې له امله ومړ.
د محمد مرسي د کورنۍ مدافع وکیل عبدالمنیب عبدالمقصود هم د محمد مرسي د کشري زوی عبدالله مرسي مړینه تائید کړې ده.
د ځینو راپورونو له مخې چې عبدالله مرسي هم د خپل پلار په څېر د مصر د واکمن لخوا په مرموز ډول وژل شوی خو په دې اړه لا تر اوسه کره شواهد نشته.
د عبدالله مرسي د مړینې خبر په داسې وخت کې مخې ته راځي چې د روان کال د جون په میاشت کې د نوموړي پلار محمد مرسي هم په داسې حال کې ساه ورکړه چې د محکمې سالون ته له زندانه راوړل شوی وو.
د محمد مرسي نه پنځه اولادونه احمد مرسي، شیما مرسي، اسامه مرسي، عمر مرسي او عبدالله مرسي پاتې وو چې وروستي یوه یې نن ژوند له لاسه ورکړ.
