کابل ټکی کام( شنبه، ۱۶وږی، ۱۳۹۸)
د متحده ایالتونو د دفاع وزیر مارک اېسپر ویلي چې امریکا له طالبانو سره د یوې ښې معاملې په لټه کې ده.
نوموړي دغه خبرې په پاریس کې یوې خبرې غونډې ته د وینا پر مهال کړي دي.
دی وایي چې له طالبانو سره یوه داسې معامله کوي ترڅو په نتیجه کې یې د دواړو هیوادونو امنیت تامین او د افغانستان د ښې راتلونکې لپاره ګټوره تمامه شي.
د ده په ټکو: “زما او د امريکا د حکومت نظر دا دی، چې د دې کړکېچ د ختمولو يوازينۍ لار د سياسي حللارې لټول دي چې موږ پرې دا ګړۍ کار کوو، دا په دې معنا نه ده چې موږ به هر تړون منو، تړون بايد ښه تړون وي چې لږ ترلږه زموږ هېواد لپاره د خونديتوب او افغانانو لپاره د يوه ښه راتلونکي ضمانت وي”
نوموړی دا خبرې په داسې وخت کې کوي چې د امریکا د بهرنیو چارو وزارت ځانګړی استازی زلمی خلیلزاد او په افغانستان کې د ناټو ځواکونو عمومي قومندان جنرال سکاټ میلر په قطر کې دي او له طالبانو سره د وروستۍ هوکړې لپاره په خبرو اترو بوخت دي.
