کابل ټکی کام( یکشنبه، ۱۷وږی، ۱۳۹۸)
طالبانو د امریکایي ولسمشر ډونالډ ټرمپ هغو وروستیو خبرو ته ځواب ویلي چې نوموړي د افغان سولې په اړه د طالبانو سره د روانو مذاکراتو په اړه کړې وې.
ټرمپ نن سهار وختي په خپل ټویټر ولیکل چې له طالبانو سره یې د سولې روانې خبرې ودرولې او په وینا یې چې امریکا ته د طالبانو د مشرانو تګ یې هم کینسل کړ.
ټرمپ لیکلي وو: “هیڅوک پدې خبر نه ول چي د یکشبنې په ورځ به د طالبانو مهم مشران او د افغانستان جمهورریس جلا جلا زما سره په کمپ ډېوډ کي په مخفي توګه ملاقات وکړي. هغوی باید نن شپه امریکا ته راغلي وای. خو له بده مرغه، طالبانو د خپل کاذب قدرت د ښودلو لپاره دا ومنله چي هغوی په کابل کي حمله وکړه، او زموږ یو بهادر عسکر او ۱۱ تنه نور يې ووژل.”
طالبانو لږ مخکې د ډونالډ ټرمپ د دې خبرو په غبرګون کې یوه معقوله اعلامیه خپره کړې او پکې لیکلي یې دي چې د ټرمپ دغه خبرې به تر هر چا زیات تاوان خپله امریکا ته ورسوي او په ټکو یې چې اعتبار به یې زیانمن، د سر او مال زیان به یې زیات شي.
طالبانو ویلي چې امریکایي لوری تر پرونه د سولې له روانو خبرو راضي وو او په وینا یې چې په دې وخت کې دواړه لوري د توافقنامې د اعلان او لاسلیک په تیاریو بوخت وو.
د اعلامیې له مخې چې د هوکړې تر لاسلیکیدو وروسته د روانې میاشتې ۲۳مه نیټه د بین الافغاني خبرو د پیل لومړی ورځ ټاکل شوې وه.
طالبانو د ټرمپ لخوا د یوه سرتیري د وژلو پر سر د سولې روان جریان درول له حوصلې او تجربې لرې کار بللی او زیاته کړې یې ده چې تر یاد برید مخکې امریکا او داخلي ملاتړو یې په ګڼو بریدونو کې سلګونه افغانان ووژل او شمتنۍ یې ورته د اور خوراک کړې.
په خپره شوې اعلامیه کې امریکا ته د طالب مشرانو د سفر په اړه ویل شوي: “د امریکا متحده ایالاتو ته د جمهور رئیس ټرمپ له لوري د ورتګ بلنه ډاکټر زلمي خلیلزاد د اګست د میاشتي په ورستیو کې راکړه، موږ یاد سفر په دوحه کې د توافقنامې تر لاسلیک پوري ځنډولی و.”
طالبانو د خپل باور له مخې ویلي چې امریکا به بیرته همدې دریځ ته راځي او زیاته کړې یې ده چې طالبان متزلزل دریځ نه لري بلکې شل کاله وړاندې یې هم د تفاهم غږ پورته کړی وو.
د اعلامیې په پای کې راغلي: “زموږ د تیرو اتلسو کلونو مبارزې به امریکاته ثابته کړې وي چې موږ بې له دې چې د هیواد اشغال مو په ټولیزه توګه پای ته ونه رسیږي او افغانان خپلې خوښې ته پرېنښودل شي په بل هيڅ شي نه قانع کیږو، د همدې ستر هدف لپاره به روان جهاد ته دوام ورکوو او په نهايي بري باندې کلک باور لرو. ان شاءالله و ماذلک علی الله بعزیز”
