کابل ټکی کام (یکشنبه، ۱۴ تله ، ۱۳۹۸ل)
امریکایي رسنۍ خبر ورکوي چې د امریکا په کینزاس ایالت کې یو وسله وال بریدګر په یو هوټل کې پر ناستو کسانو د ټوپک ډزې کړې دي چې له امله یې نهه کسانو ته مرګ ژوبله اوښتې.
د یاد ایالت پولیسو ویلي، برید کوونکی یوازې و او کله چې له موټره راښکته شو په هوټل کې یې پر ناستو کسانو ډزې وکړې او څلور کسان یې ووژل اوپنځه نور یې سخت ټپیان کړل.
د پولیسو په خبره، وسله وال د پېښې له ځایه پښې سپکې کړې او دوی یې لټون پیل کړی دی تر څو معلوم کړي چې ولې داپیښه رامنځته شوه.
امریکا کې په دې وروستیو کې دا ډول بریدونه ډېر شوي چې امریکایان یې سخت اندېښمن کړي دي.
تېره میاشت دوه ځله دامریکا په مهمو ایالتونو کې ورته پیښې رامنځته شوې چې هیڅ لامل یې معلوم نشو.
