راپورتاژ: عبدالرحمن
پرون د يکشنبې په ورځ ناوخته د جمهوري ریاست وياند صديق صديقي په خپله ټويټر پاڼه اعلان وکړ چې د ولسمشر غني په ځانګړي حکم د بهرنيو چارو د وزارت سرپرست ویاند صبغت الله احمدي د غير مسؤولانه څرګندونو په خاطر له دندې ګوښه شوی دی.
په اعلاميه کې د اشرف غني د حکم له مخې، په ترکمنستان کې د افغانستان پخوانی سفير ميرويس ناب د بهرنيو چارو د وزارت نوی سرپرست ویاند ټاکل شوی خو اجرائيه مشر ډاکټر عبدالله د ډاکټر غني حکم رد او وايي چې احمدي به پر خپله دنده پاتې وي.
د بهرنيو چارو وزارت ویاند صبغت الله احمدي پاکستان ته د طالب پلاوي له سفر وروسته ويلي و چې د سولې د هڅو په اړه د پاکستان او سيمې هيوادونو هرکلی کوي چې د ولسمشر د ویاند صديق صديقي له خوا د نوموړي څرګندونې د هغه شخصي نظر وبلل شو او ارګ او بهرنيو چارو وزارت په رسنيزو ناندريو سره واوختل.
د بهرنیو چارو د وزارت سرپرست ویاند په خپله رسمي ټويټرپاڼه وليکل چې څرګندونې يې د افغانستان د بهرنيو چارو د وزارت په استازيتوب د افغانستان رسمي دريځ دی.
په داسې حال کې د بهرنیو چارو د وزارت سياسي مرستيال اسلام اباد ته د طالب پلاوي د سفر او د سولې اړوند د هغه هيواد د هڅو هرکلی وکړ چې د بهرنيو چارو سياسي مرستيال ادريس زمان ويلي و چې پاکستان ته د طالب پلاوي سفر د سولې بهير سره هيڅ تړاو نه لري.
د ولسمشرۍ او د بهرنیو چارو د وزارت د وياندويانو له ناندریو وروسته پرون ناوخته اشرف غني د یوه حکم له مخې د بهرنیو چارو وزارت سرپرست وياند صبغت الله احمدي له دندې ګوښه کړ خو اجرائيه مشر ډاکټر عبدالله ويلي، په اوسنيو شرايطو کې د کسانو له دندې ګوښه کيدل په ټاکنو پورې اړه لري او تر هغې چې د ټاکنو پايلې اعلانيږي د بهرنیو چارو سرپرست وياند به پرخپله دنده پاتې وي.
په عین حال کې د مشرانو جرګې غړی محمد رحیم حسنيار د ارګ او بهرنيو چارو وزارت تر منځ بيلابيل نظرونه د شرم وړ بولي او دغه راز د جرګې بل غړی رحمت الله اڅکزی بيا وايي، چې په ملي مسائلو کې بايد د دولت مشران یو نظر ولري.
تر دې مخکې هم د ارګ او بهرنيو چارو وزارت تر منځ اختلافات رامنځته شوي و چې د ولسمشر ډیری حکمونه يې مات کړي دي.
طالبانو هم د ارګ او کورنیو چارو وزارت اختلافاتو ته په اشارې وويل، چې د دواړو خواوو تر منځ د سولې په تړاو متضاد دريځونه د اسلامي امارت هغه موقف ثابتوي چې د کابل اداره د سولې د خبرو او پریکړو وړتيا او صلاحيت نه لري.
طالب ویاند ذبیح الله مجاهد ويلي و چې د ګډ حکومت په دومره اوږده موده کې د یو ګډ مذاکراتي ټیم په جوړولو بريالی نه شو او دغه حالت ته په کتو اسلامي امارت په هیواد کې له مختلفو لوريو سره خبرې ولري.
