(کابل ټکی کام، ۱۳۹۸، تله ۱۶، سه شنبه)
د افغانستان د ولسمشرۍ ټاکنو شورا وايي، چې د درغلیو او په ټاکنو کې د خلکو د کم ګډون له کبله راتلونکی حکومت مشروعيت نه لري.
د نوماندانو شورا پرون د يوه کنفرانس په وروستیو کې پریکړه لیک صادر کړ چې وايي، که پاکې او ناپاکې رايې بيلې شي نو یو ميلیون رايې باطليږي او که بيلې نه شي نو بايد ولسمشريزې ټاکنې لغوه اعلان شي.
دوی وايي، په ټاکنو کې درغلۍ، پراخ فساد او د خلکو کمرنګه ګډون به د ټاکنو مسئله جنجالي کړي او یادې ټاکنې د ستونزو له کبله ګټونکی نه لري نو راتلونکی حکومت هم تر سوال لاندې راځي چې هيڅ مشروعيت به ونه لري.
د ولسمشريزو ټاکنو نوماندانو فرامرز تمنا، رحمت الله نبيل، عنايت حفيظ ، د ګلبدین حکمتيار ټيم او څو نورو نوماندانو دغه ټاکنې له درغليو، فساد ډکې وبللې په وینا يې چې خلکو د کمرنګه ګډون له کبله بايد لغوه شي.
فرامرز تمنا وويل، ښايي د تلې مياشتې د شپږې په ټاکنو کې يوازې يونیم ميلیون کسانو ګډون کړی وي او رايې يې شفافې وي زياتوي نورې رايې ښايې له درغليو ډکې او بې بايومټريکه وي چې په خبره يې ” که بایومټریک او سمې رایې له نورو جلا کړو، نو یوازې یو نیم میلیون رایې به سمې پاتې شي چې په دې سره د حکومت مشروعیت له پوښتنې سره مخ کېږي”.
د ولسمشريزو ټاکنو له ترسره کيدو وروسته ټولو ټاکنيزو ټيمونو او څارونکو بنسټونو پر ټاکنيز بهير او د کمېسيونونو پر کړنو نيوکې کړي دي.
