کابل ټکی کام (شنبه، ۱۲ غویی، ۱۴۰۵ل)
د هلمند د اطلاعاتو او کلتور رئیس حافظ عبدالباري راشد وایي، د ناوې ولسوالۍ د عینک سیمې په هلمند سیند کې شپږ مېرمنې اوبو وړي، چې له ډلې یې دوه ژغورل شوي، د دوو جسدونه موندل شوي او دوه نورې لا هم نادرکه دي.
د نوموړي په وینا، لومړی یوه مشره ښځه اوبو وړې وه او نورو ښځو یې د ژغورلو هڅه کړې، خو خپله هم د سیند تیزو اوبو کې بندې شوې دي. راشد زیاته کړې، د ناوې ولسوالۍ په سرخ دوز سیمه کې دوه ماشومان هم سیند وړي او جسدونه یې لا نه دي موندل شوي.
بل لور ته، د ننګرهار د امنیې قومندانۍ ویاند سید طیب حماد ویلي، د مهمندرې ولسوالۍ په هزارناو او د نازیانو ولسوالۍ په ناکامورا ډنډ کې درې تنه د لامبو وهلو پر مهال اوبو وړي او ژوند یې له لاسه ورکړی دی.
د هغه په خبره، د یادو کسانو جسدونه له اوبو را ایستل شوي او کورنیو ته سپارل شوي دي.
