راپورتاژ: عبدالرحمن
پرون په کابل کې د ملګرو ملتونو يوناما دفتر په یوه راپور کې تاييد کړه چې تيره مياشت د امریکايي ځواکونو په هوايي بريد کې ديرش ملکيان وژل شوي او نهه نور ټپيان دي چې امریکايي ځواکونو راپور رد او طالبانو يې هرکلی کړی دی.
د تيرې مئ مياشتې په پنځمه نيټه د کورنيو چارو وزارت په ياده سیمه کې د هوايي برید د سلو تنو په شاوخوا کې طالبانو ته يې مرګ ژوبله اړولې چې هغه مهال هم طالبانو د خپلو پلويانو وژل کيدل رد کړي.
پرون په کابل کې د ملګرو ملتونو یوناما دفتر په يوه راپور کې وويل، هغه مهال امریکايي ځواکونو او حکومتي چارواکو د طالبانو د وژل کيدو ادعا کړې وه خو زیاتوي چې دوی کره اسناد راټول کړي چې هوايي بريدونه په ملکي خلکو ترسره شوي او ټول قربانيان يې ملکي وګړي دي.
ملګري ملتونه وايي، دوی په سیمه کې پلټنې کړي چې د معلوماتو له مخې يې په یادو بریدونو کې د څوارلس ماشومانو په شمول نهه ديرش کسانو ته مرګ ژوبله اوښتې وه چې له ډلې يې ۳۰ تنه وژل شوي و.
د کورنیو چارو وزارت او امریکايي چارواکو ادعا او د ملګرو ملتونو د پلټنو راپور:
د تيرې مئ مياشتې پر پنځمه نيټه امریکايي او حکومتي چارواکو ادعا وکړه چې په نيمرو او فراه ولايتوو کې يې د طالبانو د مخدره توکو کارخانې هدف ګرځولي دي.
د پوځي سرچينو د معلوماتو پر بنسټ، په یادو بريدونو کې امریکايي پوځ تر شپيتو پورې هدفونه تر بريدونو لاندې نيولي و.
امریکايي چارواکو ادعا کړې وه چې طالبانو په یادو کارخانو کې مخدره توکي جوړول هغه چې طالبانو هغه مهال هم رد کړې وه او اوس ملګرو ملتونو ويلي، چې امریکا اولسي ميشت ځايونه هدف ګرځولی دي.
دغه راز ملګرو ملتونو ويلي، په یاده سیمه کې يوازې طالبان نه بلکې نورې جنايي ډلې هم شته چې له کبله يې چې ښايي ناقانونه فعاليتونه به يې کول خو زياتوي د نړيوال قانون له مخې دوی پوځي هدف نه شي بلل کيدای.
طالبانو د ملګرو ملتونو د راپور هرکلی او د ورته ډول نورو بريدونو د پلټنو غوښتنه يې کړې:
طالبانو په فراه ولايت کې د امریکايانو له لوري د ملکي تلفاتو اوښتو په تړاو د يوناما د راپور هرکلی کړی او طالبانو د (ملکي تلفاتو د مخنیوي د کمېسيون) له لوري په خپره شوې اعلاميه کې راغلي، چې له کله نه امریکا پر افغانستان یرغل کړی له همغه وخت راهيسې دغه ډول زرګونه پيښې رامنځته شوي چې ډير ملکي هیوادوال پکې په قصدي او ډلیزه توګه وژل شوي دي.
د طالبانو اعلاميه زياتوي، ( د اسلامي امارت د ملکي تلفاتو د مخنیوي اوسمع شکایاتو کمیسیون، د یوناما لخوا د دغه حقیقت موندنې او اعلان هرکلي کوي او د داسې زړه بوګونکو ملکي پيښو په اړه يې لا هم ډيره او پر خپل وخت توجه غواړي).
د امریکايي پوځ له خوا د یاد راپور ردول او د ملکيانو له وژلو انکار:
په افغانستان کې ميشت امریکايي ځواکونو په فراه کې د دوی د هوايي برید په ترڅ کې د وژل شويو ملکيانو په اړه د یوناما راپور په داسې حال کې ردوي چې ملګري ملتونه وايي، د بریدونو سیمې ته ورغلي او له ځایي خلکو سره یې مخامخ خبرې کړې چې په وينا يې وژل شوي کسان ټول ملکيان دي.
خو امریکايي پوځ بيا دغه تورونه بې اساسه بللي زياتوي چې دوی د هوايي بريدونو پر مهال او جګړييزو ماموريتونو پر مهال له پوره احتياط او دقت څخه کار اخلي.
