غورځنګ
دا چې د امریکا په څېر د یوه داسې يرغلګر هېواد جمهور رئيس بايد د يوې پرېکړې خاوند وي او دمتزلزل دريځ څښتن بايد نه وي، د هېواد، نړيوالو او ان يرغمل شويو هېوادونو لپاره بايد پر يوه پرېکړه ولاړ واوسي، او د هر چا په اړه بايد يوه قاطع فيصله ولري.
خو د امريکا اوسنی جمهور رئيس چې د زور له لارې واک ته رسېدلی دی؛ داسې نه دی، بلکې د يوه متزلزل دريځ څښتن ولسمشر دی، د خپل متزلزل دريځ له امله يې دا دی دی ټولو ډېر مخالفين په خپله په امریکا کې دي، چې هر وخت د ده پر خلاف شعارونه ورکوي، ان تر دې چې په امريکا کې دننه په دولتي کچه هم زياتره دولتي چارواکي د ټرمپ د متزلزل دريځ پر خلاف دي، او وخت پر وخت يې د پرېکړو مخالفت کوي.
ټرمپ هم په دې نه پوهېږي چې څه ډول دريځ خپل کړي، د چا ومني؟ چا ته اعتبار ورکړي؟ او څوک وپوښتي؟ د ټرمپ غير رسمي ټويټونو، سُست او ژر بدلېدوني دريځ، متزلزل تصميم او ارادې دا دی اوس په ټوله نړۍ کې د امريکا حيثيت ته پوره تاوان او زيان رسولی دی، او د څېړونکو په اند امريکا بيا نشي کولی چې خپل پخواني موقف ته ځان بېرته بوځي. ځکه چې ډونلډ ټرمپ د خپلو متزلزلو دريځونو، جنګي ناکامو سیاستونو، د فرېب او دوکې ستراتيژيو، او نورو ورانکاريو له امله د امريکا نړيوال موقف ته سخت تاوان اړولی دی او اوس د امريکا ستنېدل بېرته خپل موقف او مقام ته يو ناشونی او محال کار دی.
د ټرمپ د ناکامو سياستونو او متزلزلو دريځونو له جملې څه بايد دلته يادونه وکړو:
ټرمپ چې د خپل جمهوري رياست په لومړيو کې يې په جګړه ييزو تکتيکونو ټينګار کولو او تل به يې ويل چې بايد جګړه وکړي او له دې لارې د افغانستان طالبان مات کړي، خو تقريباً له يوه کال وروسته يې ژر درک کړه چې افغانستان چا په زور نه دی نيولی نو د رضا، سولې او مذاکراتو لار يې غوره کړه او د سولې د هئيت د مشر په توګه يې زلمی خليلزاد اسيايي هېوادونو ته راولېږه تر څو له طالبانو سره سوله وکړي او په ترڅ کې به يې امریکا هم خپل ټول ځواکونه له افغانستان څخه وباسي.
خو بيا هم البته يا هم خليلزاد پر خپل سر او يا هم د ټرمپ او نورو امریکايي لوړ پوړو چارواکو په وينا او لارښوونه په دې هڅه کې شو چې طالبان وغولوي، خو کله چې دا کار ورته ناشونی وبرېښوده نو په دويم قدم کې يې داسې هڅې پيل کړې چې د افغانستان ملت، اسلامي هېوادونو او ان ټولو نړيوالو ته وښيي چې طالبان د ګاونډيو هېوادونو د ګټو لپاره جنګېږي، خو د طالبانو کلک او سخت دريځ خليلزاد او د امريکا د سولې نور هيئت دې اړ وېست چې د طالبانو د مبارزې او مجادلې حقانيت ومني. نو د امریکا د سولې هيئت له دې جال څه هم تېر او په حقيقت کې سولې ته کېناستل، له طالبانو سره يې ايله په نهو مياشتو کې د سولې په اړه يوه موافقه نهايي کړه او تمه وه چې ژر به يې اعلان کړي، خو ټرمپ د يوه ټويټ په ترڅ کې بيا د خپل متزلزل دريځ او ناکام سياست له امله د سولې په اړه دغه پرمختللې خبرې ودرولې او ادعا يې وکړه چې په کابل کې طالبانو يو امریکايي پوځي وژلی.
ټرمپ که څه هم ګومان کاوه چې په دې واسطه به د طالبانو دريځ يا نرم کړي او يا به هم طالبان په نړۍ کې د ناکامو سياست والو په حيث معرفي کړي.
خو په دې دام کې ټرمپ په خپله ګير شو او ټولې نړۍ ته يې خپل جنګي خباثت وښوده چې ټرمپ او امریکايي لوړپوړي چارواکي جګړه خوښوي او سولې په هېڅ ارزښت او اهميت قائل نه دي نو له دې امله وايو چې ټرمپ يو ناکام سياستمدار امريکايي ولسمشر دی، چې په خپل ناکام سیاست يې د امريکا نړيوال حيثيت هم له ناکامۍ سره مخ کړ.
خو اوس دا دی لومړی خو خليلزاد د طالبانو له استازو سره د سولې په اړه په اسلام اباد کې پټه لیدنه وکړه او بيا يې له طالبانو سره د سولې په اړه اميدواري وښودله.
او دا دی تېره ورځ ټرمپ هم ټويټ وکړ او بیا يې يوې کمپايني غونډې ته په خپله وينا کې وويل «چې سوريې ته مونږ د مياشتو لپاره تللي وو، خو اوس مو لسم کال دی نو بايد خپل ځواکونو له هغه ځایه راوباسو، او افغانستان کې مو هم دا دی په بې ګټې جګړه کې اتلس يا نولس کاله تېر کړل خو بيا مو هم هېڅ ونه کړل او هسې مو وخت تېر کړ نو اوس د دې وخت رارسېدلی دی چې خپل ځواکونو ژر تر ژره افغانستان او سوريې څخه راوباسو»
د ټرمپ له دا ډول دريځونو څخه معلومېږي چې د امريکا په تاریخ کې ناکام سياستمدار دی، که څه هم جګړه د امریکا فطري خاصيت دی او انسان وژنه او بشر وژنه يې خپل شيطاني دنده ده خو په ټول تاريخ کې يې ټرمپ ناکام سياستمدار دی او په عبس جګړه ټينګار کوي. په داسې حال کې چې د جګړې سياست همېشه ناکام او بې بريا وي او بيا له داسې يوه قوم سره چې هېڅ يرغلګر ته يې سر نه دی ټيټ کړی.
