کابل ټکی کام (چهار شنبه، ٢٤ تله ، ۱۳۹۸ل)
د ترکيې لخوا په سوريه کې د کردانو پر خلاف تر پوځي بريد وروسته په لومړي ځل د ترکي او سوري پوځيانو او د ترکيې ملاتړو انقلابيانو ترمنځ نښته شوې.
د سوريې حکومت له کردانوسره د یوې هوکړې له مخې هغو سیمو ته خپل ځواکونه ليږلي چې مخکې د کردانو تر ولکې لاندې وې او ترکي ځواکونو پکې عملیات پيل کړي دي.
د کردانو تر کنترول لاندې سیمو ته د سوري پوځیانو ننوتلو او د ترکيې له لورې په جګړه کې پرمختګ د دواړو هيوادونو ترمنځ د جګړې شونتیا ډېره کړې ده.
د (سکای نیوز) د راپور له مخې، منبج ته څېرمه دې جګړه کې د ترکیې یو پوځي ژوبل شوی، خوسوري پوځیانو ته د اوښتې مرګ ژوبلې په هکله څه نه دي ويل شوي.
تر دې وړاندژ د سوریې رسمي خبري اژانس (سانا) خبر ورکړی و چې د سوريې پوځیان د حلب شمال ختیځ منبج ښار ته ننوتي، پر ښار يې کنترول ترلاسه کړى او د جګړې په لیکو کې ځای پر ځای شوي دي.
ورته وخت کې د (عین عیسی) سیمې په ختيځ کې د ترکیې د ملاتړو انقلابیانو او سوري پوځیانو ترمنځ جګړه شوې چې په ترڅ کې يې د سوريې ۳ تنه پوځیان وژل شوي او ۴ نور ژوبل دي.
دې سیمه کې کردي وسله والې مليشې د سوریې له پوځیانوسره یو ځای د انقلابیانو اوترک پوځيانو پر وړاندې جګړه پر مخ بیايي.
همدا مهال په راس العین ښار کې د ترکي پوځیانو او کردي وسلوالو ترمنځ سختې جګړې روانې دي.
رپوټونه وايي، په دې ښار کې نن تر ټولو خونړۍ جګړه روانه وه او د ښار له بېلابېلو برخو لوګي پورته کېدل.
سوریه کې شدیدې جګړې اوتاوتريخوالې په داسې مهال روان دي چې د ترکیې ولسمشر د امریکا له لورې د سوریې په شمال کې د اوربند غوښتنه رد کړې او ویلې دي چې خپلو عملیاتو ته به دوام ورکوي.
