کابل ټکی کام (سه شنبه، ٣٠ تله ، ۱۳۹۸ل)
د فلسطين د حماس جهادي غورځنګ يوه مهم مشر «سامي ابو زهري» وايي، د سعودي په بيلابيلو زندانونو کې د حماس د رهبري غړو په ګډون ګڼ شمېر فلسطيني وګړي د بهرنيو استخباراتي اجيرانو په لاسونو تر سختو شکنجو لاندې دي.
ابو زهري د فلسطين «شهاب نيوز» سره په خبرو کې ويلي: «په ډېر خفګان سره بايد ووايو، چې سعودي کې زموږ له بنديانو سره ډېر دردونکى چلند روان دی، بهرني استخبارات ترې تحقيق کوي او تر سختو شکنجو لاندې يې نيسي او ځينې يې ان تر مرګه رسولي دي.
نوموړى زياتوي، سعودي حکومت په دې وروستيو کې شپېته فلسطينيان نيولي چې دا کار له دوى سره نه ښايي.
د سامي ابو زهري په خبره په دغو بنديانو کې د حماس د رهبري شورى د غړي اود پوهنتون داستاد شيخ محمد صالح الخضري په ګډون د دوى يو شمېر نور مهم غړي هم شته
حماس جهادي غورځنګ وايي، چې استاذ الخضري له څو مياشتو راهيسې په سعودي کې زنداني دی، تر اوسه يې د نيولو لامل نه دى څرګند او نه هم سعودي چارواکو په دې تړاو د حماس غوښتنو ته ځواب ويلى دى.
ابو زهري زياتوي: په دغو شپېتو فلسطينيانو کې يې ځينې د د حماس جهادي غورځنګ غړي دي، چې له تېرو ديرشو کلونو راهيسې په سعودي عربستان کې استوګن دي.
نوموړى وايي، حماس ډېرې هڅې کړې، چې دسعودي چارواکو سره په اړيکه کې شي، خو تر اوسه يې کومه دپام وړ ګټه نه ده کړې.
