کابل ټکی کام (چهار شنبه، ۱ لړم ، ۱۳۹۸ل)
ارګ په یوه تازه اعلامیه کې ويلي چې ولسمشر غني د باندنيو چارو د سرپرست وزير صلاح الدين رباني استعفا ومنله او ژر به دغه وزارت ته بل نوی سرپرست وزير وټاکي.
د بهرنیو چارو سرپرست صلاح الدین رباني نن له خپلې دندې استعفا کړې وه.
هغه په خپل استعفالیک کې لیکلي و، د ملي وحدت حکومت له پیله تر اوسه ورته پر دې څوکۍ کار کول مطلوب نه و، ځکه چې په وینا یې له دې وزارت سره د هغه چا له لوري چې ځان ته د دولت ساز خطاب هم کوي، د یوې انجیو په څېر چلند کېده.
هغه زیاته کړې وه، د اوسني حکومت دوره نوره پای ته رسېدلې ده او په اوسنیو بدو شرایطو کې تر هر څه ډېر یووالي ته اړتیا ده نو دی خپله استعفا وړاندې کوي څو خپلو خلکو ته د نورو سیاسي فعالیتونو له لارې خدمت وکړي.
یاده استعفا په دې حساسو شرائطو کې ځینې سیاسي مبصرینو دکابل حکومت په زیان او د رباني غښتلتیا بللې، او زیاته کړې ده، د رباني استعفا وښوده چې کابل په سخت وضعیت کې قرار لري، او ممکن د یو موقت حکومت په رامنځنته کېدا سره رباني غواړي تر څو حکومت شاړ پریږدي او له موقت حکومت څخه بې برخې نشي.
