(کابل ټکی کام، ۱۳۹۸ لړم ۵، يکشنبه)
د بغلان چارواکي وايي، چې د دغه ولايت په نهرین ولسوالۍ کې د طالبانو د بريدونو له کبله پنځلس عسکرو ته مرګ ژوبله اوښتې ده.
د بغلان د ولايتي شورا غړی اسدالله شهباز وايي، طالبانو تيره شبه د يادې ولسوالۍ مربوط په ارشه کش سيمه کې پر پوستو بريدونه کړي چې په ترڅ کې يې اته عسکر وژل شوي او اووه تنه نور ټپيان دي.
طالبانو د بريد مسؤوليت منلی وياند يې ذبیح الله مجاهد په خپله رسمي ټويټرپاڼه لیکي، په ياده سيمه کې دوه پوستې طالبانو نيولي، د درې قوماندانانو (سردار، محب الله او رازق) په شمول اته عسکر وژل شوي او نهه تنه نور ټپيان دي.
په عین حال کې د بغلان د امنیه قوماندانۍ وياند جاويد بشارت د طالبانو بريدونه تاييدوي خو په اړه يې له جزياتو ورکولو ډډه کوي.
په وروستيو کې يو ځل بیا طالبانو د دولتي ځواکونو پر پوستو، پوځي تأسيساتو او مرکزونو بريدونه زيات کړي چې له امله يې د افغان پوځ مرګ ژوبله تر پخوا څو چنده زیاته شوې او د طالبانو د حاکميت ساحه تر پخوا لا زياته شوې ده.
