(کابل ټکی کام، ۱۳۹۸ لړم ۵، يکشنبه)
طالبانو د ناټو وروستیو غونډو ته په غبرګون کې ويلي، ناټو غړي هيوادونه په افغانستان کې په ستر جنجال اوښتي چې هر کال د افغانستان په مسئلې غونډې او بحثونه کوي خو دغه کنفراسونه بې اغيزې او بې پايلو دي.
طالبانو د اونۍ تبصره کې چې د اسلامي امارت رسمي دريځ څرګندوني وايي، ناټو د اکتوبر د ۲۶ نيټې کنفرانس په څير په تيرو اتلس کلونو کې ډيری کنفرانسونه، وعدې کړي او ستراتيژۍ يې بدلې کړي خو ټول يې بې نتیجې، پوچ ختلي او په عملي ډګر کې يې هيڅ اغيز نه ليدل کيږي.
طالبانو د پوښتنې په ډول ويلي، چې ترڅو به د ناټو غړي هیوادونه افغانستان کې ناکامې تجربې تکراروي او خپلو اولسونو ته به درواغ وايي زياتوي “له اوږدو تجربو وروسته اوس ټول د عقل او ادراک خاوندان دې نتیجې ته رسیدلي چې په افغانستان کې د بهرنیو پوځونو بریا ناممکنه ده، ځکه په وړاندې یې ټول افغان اولس ولاړ دی”.
طالبان وايي، افغانستان کې ناټو ناکامه، دايمې بريا نه شي ترلاسه کولی، په خپلو ستراتيژيو دې له سره غور وکړي څو يې د خپلو اتباعو ژوند او مال خوندي ساتلی وي : “باید سر له اوسه په دې هیواد کې له مداخلې لاس واخلي او زموږ په خپلواکۍ مین اولس پریږدي چې خپل سرنوشت په خپله تعین کړي”.
طالبانو په ناټو سازمان غږ کړی چې له تکراري او بې ګټې کنفرانسونو تير شي او له تيرو اتلس کلنو تجربو دې درس واخلي زياتوي :”د افغانستان اسلامي امارت د ناټو سازمان په غړو هیوادونو غږ کوي چې د افغانستان وضعیت دې په دقیق ډول مطالعه او بیا دې حقائقو ته تسلیم شي. د دې مسئلې حل د تکراري کانفرانسونو په تدویر سره نه موندل کیږي. بلکې له حقائقو سره واقع بینانه چلند او له اتلس کلونو تجربو درس اخیستل یې یوازینۍ لاره ده”.
دغه راز طالبانو په کابل کې د امریکا پر جوړ کړي حکومت غږ کړی چې د ناټو سازمان پر ژمنو او ځواک ډير باور ونه کړي ځکه چې په وینا يې (دلته یو وخت برتانوي امپراطورۍ د شاه شجاع او وارسا تړون د کارمل تر شاه ولاړ و خو پايله يې ماتې او شرمندګي وه”.
