هلمند کې د لړمانو فارم؛ چې د یو کېلو زهرو بیه یې لس میلیون ډالرو ته رسیږي
کابل ټکى کام (دوشنبه ، ١٣ لړم ، ١٣٩٨ل)
د هلمند ولایت مرکز لښکرګاه کې د لړمانو یو مجهز فارم جوړ او ګټې اخستنې ته وسپارل شو.
د افغانستان د کرهڼې او مالدارۍ وزارت وایي، چې د هلمند ولایت په لښکرګاه ښار کې د لړم روزنې یو مجهز فارم ګټې اخیستنې ته سپارل شوی، چې د ۱۶۰۰۰زره لړمانو د ساتنې ظرفيت لري.
د هلمند ولایت د کرهڼې رئیس زلمی الکو وايي، چې ریاست يې د ياد فارم د پرمختیا په موخه د فارم شته ستونزې ارزوي او د حل لپاره یې دوی ته لازمې لارښوونې ورکوي.
د ياد فارم خاوندان له حکومت څخه غوښتنه کوي چې نړیوالو بازارونو کې دې د زهرو د پلور مارکيټ ورته پيدا کړي، د فارم جوړونکو په وینا دغه فارم یې د هلمند ولایت د لړمانو د قاچاق د مخنیوي په موخه جوړ کړی دی.
لړمان چې دچینجيو په خوراک ژوند کوي، هر لړم درې میاشتو کې شپږ څاڅکي زهر تولیدوي او د لړمانو زهر، چې د سرطاني ناروغيو په درملو کې ترې استفاده کیږي، په نړۍ کې تر ټولو ګران بيه ماده ده، چې د یو ليټر بیه یې نږدې لس میلیونه ډالرو ته رسیږي.
د کرهڼې او اوبولګولو وزارت په خبره، دغه فارم د خصوصي سکټور له خوا جوړ شوی؛ خو د هلمند ولایت د کرهڼې ریاست هر اړخیزه مرستې او همکارۍ ورسره کوي.
د یادونې وړ ده چې د لړمانو روزنې فارم افغانستان کې په لومړي ځل هرات ولایت کې جوړ شو، چې وروسته بيا ځینو نورو ولایتونو کې هم ورته فارمونو فعالیت پیل کړ.
