کابل ټکى کام (پنجشنبه، ۱۶ لړم ، ١٣٩٨ل)
د ایران د مذهبي رهبر خامنه ای د دفتر رییس محمد محمدي ګلپایګاني وایي، په اسراییل کې هیڅ داسې نقطه نشته ده چې د دوی د توغندیو تر پوښښ لاندې نه وي.
ګلپایګاني زیاته کړې، که چېرته اسراییل د ایران پر وړاندې له دوامدارې دښمنۍ لاس پر سر نه شي نو تاریخي درس به ورکړي.
محمدي دغه څرګندونې وروسته تر هغه کوي چې اسراییل په وار وار ایران په سیمه کې د ترهګرو په ملاتړ تورن کړی دی او ګواښ یې کړی دی چې که چېرته ایران له دې کړنو لاس وانخلي، نو له نړیوالو غبرګونونو سره به مخ شي.
محمدي دغه راز ویلي، د دې پرمختګ زغمل د امریکا په ګډون د ټولو دښمنانو له توانه وتلې خبره ده، ځکه دوی په نړۍ کې د داسې اسلامي هېواد شتون نشي زغملی چې په اټومي وسلو سمبال وي.
ایران داسې مهال اسرائیل ګواښلي چې دا هیواد سعودي او امریکا سره په سخت کړکېچ کې راګیر دی، هره ګړۍ د دې احتمال شته چې په سیمه کې یوه نظامي ګډوډۍ رامنځنته شي.
