کابل ټکی کام (يکشنبه، ۱۹ لړم، ۱۳۹۸ل)
د “دولت جوړونکي” ټاکنيز ټیم لومړي معاون امرالله صالح د ګډ حکومت د اجرائیه ريس ډاکټر عبدالله نوي څرګندونو ته په غبرګون کې ويلي: ” نور دې د بهانو له سیاست نه لاس واخلي”
ديادونې وړ دی چې د “ثبات او همپالنې” ټاکنیز ټم مشر عبدالله عبدالله د افغانستان د ټاکنو له کمېسیون غوښتي چې د رایو بیا شمېرل دې ژر تر ژره ودروي .
ډاکټر عبدالله عبدالله نن یکشنبه د نومبر پر ۱۰مه «لړم۱۹مه» د لویې جرګې په خېمه کې د غونډې پر مهال وویل:” زموږ ټېم خبرو ته چمتو دی، دغه خبرې کېدایشي د نړیوالو او داخلي ناظرینو او ټیفا او فیفا په حضور کې تر سره شي، موږ کړکېچ ته د ټاکنو بهیر د ایستلو هڅه کې نه یو، بلکې له درغلیو څخه د ټاکنو بهیر د ایستلو هڅه کوو.”
هغه ګواښ وکړ ‘د ثبات او همپالنې ډلې ‘له ناظرینو پرته د رایو شمېر دوی ته د منلو وړ نه دی، که دا بهير ونه دريږي، دوی به پر وړاندې سوله ایز اقدامات ترسره کړي. او د قانون خلاف دې عمل له امله به د ده ټيم د ټاکنو پايلې ونه مني.
خو د دولت جوړونکي ټیم لومړي معاون امرالله صالح د ډاکټر عبدالله د څرگندونو په ځواب کې ویلي: “بهانو او تکراري سیاست نه لاس واخلئ. د خلکو او امنیتي ځواکونو د زړورتیا او فداکارۍ قدر وکړئ. په بې ځایه لاره مه ځئ.”
د يادونې وړ ده چې د ۲۰۱۴م کال تر ټاکنو وروسته هم د اشرف غني او عبدالله تر منځ د ټاکنو د پايلو په هکله اختلافات وو او هر یو د بريا ادعا کوله، په پای کې د امريکا د هغه مهال د بهرنيو چارو وزير جانکيري دا شخړه د ګډ حکومت په جوړولو هواره کړه.
