(کابل ټکی کام، ۱۳۹۸ لړم ۲۱، سه شنبه)
د ګډ حکومت مشر اشرف غني نن په یوه خبري غونډه کې اعلان وکړ چې د طالبانو د مرستيال مشر سراج الدين حقاني د ورور انس حقاني په شمول درې تنه طالبان به نن له زندانه خوشې شي.
اشرف غني د خپلو خبرو پر مهال وويل، چې نن د سر اعلی قومندان په توګه تاسې له یوه ضروري او سخت تصميم څخه خبروم زياته يې کړه ” په ۲۰۱۶ کال د اګسټ پر اتمه د افغانستان امریکايي پوهنتون دوه تنه استادان، چې یو د استرالیا و، بل د امریکا و، له کابل ښاره وتښتول شول. ددغو استادانو د څرک لګلولو لپاره زموږ ګډو هڅو کار ورنه کړ”.
د اشرف غني په خبره، له بګرام زندان څخه به نن د حاجي ولي خان د مالي خان زوی، عبدالرشيد د محمد عمر زوی او انس د جلال الدين حقاني زوی د کابل پوهنتون د یادو استادانو سره په تبادله خوشې شي.
که څه هم اشرف غني د یادو طالب زندانيانو د خوشې کيدلو اعلان وکړ خو تر دې مخکې د امریکا د بهرنيو چارو وزارت ځانګړی استازی زلمی خليلزاد څو ځلې له طالبانو سره په دې اړه خبرې کړي چې بالاخره تيره ورځ دواړه غاړې د یادو زندانيانو پر تبادلې موافقې ته رسیدلي دي.
اشرف غني دغه راز وويل، چې يوولس زره طالبان د ګډ حکومت په زندانونو کې بنديان دي او په داسې حال کې ورسره د قانوني او اسلامي ارزښتونو په رڼا کې د چلند خبره کوي چې تر دې څو څو ځلې د بګرام، پلچرخي او کندهار زندانونو کې د طالبانو په نومونو خلک شکنجه شوي، هغوی سره انساني چلند نه کيږي، روغتيايي اسانتياوې ورته نه دي برابرې شوي او سلګونه طالب زندانيان چې قيدونه يې پوره دي لا هم له په زندانونو کې ساتل کيږي.
