(کابل ټکی کام، ۱۳۹۸ لړم ۲۱، سه شنبه)
د ګډ حکومت د دفاع وزارت د وياند مرستيال فواد امان وايي، چې د ننګرهار ولايت په اچين ولسوالۍ کې د داعش وسله والو یوه ۴۵ کسيزه ډله کوماندو ځواکونو ته تسليم شوې چې زیاتره يې ميرمنې او کوچنيان دي.
نوموړی زياتوي، دغه کسان په اچين ولسوالۍ کې وروسته له هغې دولتي ځواکونو ته تسليم شوي چې د عملياتو په ترڅ کې پر هغوی فشار زيات شوی او بله لاره نه ده ورپاتې.
خو له بله پلوه طالب وياند ذبیح الله مجاهد بيا ادعا کوي چې د کابل ادارې ځواکونه د طالبانو له خوا داعش وسله وال ژغوري.
ښاغلي مجاهد په خپله رسمي ټويټرپاڼه ليکلي، چې ننګرهار ولايت کې يوځل بيا د حکومتي ځواکونو له خوا هغه داعش وسله وال ژغورل شوي چې د طالبانو له خوا کلابند و.
نوموړی زياتوي: “په ننګرهار کې یوځل بیا ۹۳ تنه داعشیان چې د اسلامي امارت مجاهدینو محاصره کړي وو، د کابل ادارې لخوا وژغورل شول. له دغو داعشي فتنه ګرو سره کورنۍ ښځې او ماشومان هم شته. هرځل چې داعشيان له ماتې سره مخ شوي، د کابل ادارې غیږه ورته خلاصه وه، پنا ورکړل شوې او د ژغورلو هڅه يې شوې ده”.
په وروستيو کې طالبانو په ننګرهار ولايت کې د داعش وسله والو پر ضد پراخ عملیات پيل کړي چې ډيرې سيمې يې د هغوی له ولکې خلاصې او دا مهال يې د هغوی جنګي کرښه د اچين ولسوالۍ مربوطاتو ته وررسولې ده.
تر دې مخکې هم د طالبانو د بريدونو او کلابنديو له ويرې یو شمير داعش وسله وال د ننګرهار ملي امنيت ادارې ته تسليم شوي و.
په امريکايي ځواکونو او د ګډ حکومت پر استخباراتي ادارې تور پورې کيږي چې افغانستان کې د داعش وسله والو ملاتړ کوي او هغوی ته له یوه ځایه بل ځای ته د تګ راتګ او نورو جنګي او خوراکي توکو سهولتونه برابروي.
شاوخوا دوه کاله مخکې هم کله چې د جوزجان په درزاب کې طالبانو داعش وسله وال کلابند کړل نو د سیمه ييز حکومت په چورلکو کې له سيمې و ايستل شول.
