د بال خرابولو له امله ویسټ انډیزي لوبغاړي بخښنه وغوښتله
کابل ټکی کام (چهارشنبه، ۲۲ لړم، ۱۳۹۸ل)
د ویسټ انډیز هيواد ځوان توپوهنکي ‘نیکولاس پوران’ د افغانستان د کرکټ له ملي لوبډلې او د افغان کرکټ له مینوالو بخښنه غوښتې ده.
نوموړي د یکشنبې په ورځ له افغانستان سره د يو ورځنيو لوبو د لړۍ په وروستۍ لوبه کې بال تمپرينګ کړی و، تر څو سوینګ ته ښه جوړ شي. دا کار د کرکټ نړیوالې شورا په قانون کې جرم ګڼل کیږي.
د کرکټ نړیوالې شورا د دغه جرم له امله ياد لوبغاړی له څلورو شل اوريزو لوبو څخه بند کړ او ځینې نومرې یې هم کمې شوي دي.
د کرکټ نړیوالې شورا په یوې خبر پاڼه کې ویلي دي چې ‘نیکولاس پوران’ خپله تېروتنه منلې ده او د نه تکرار ژمنه یې هم کړې ده.
د يادونې وړ ده چې افغانستان د ویسټ انډیز پر وړاندې د خپلو دریو پنځوس اوريزو لوبو لړۍ ۳-۰ وبایلله. او د دريو ۲۰ اوريزو لوبو لړۍ یې سبا پنجنشبه پیلیږي.
