مولانا فضل الرحمن د ازادي مارچ په پایته رسولو سره د پاکستان په ټولو ښارونو کې دمظاهرو اعلان وکړ

راپورتاژ: عاصم

د جمعیت علمای اسلام (ف)ګوند مشر مولانا فضل الرحمن په اسلام اباد کې د حکومت خلاف د اپوزيسيون ګوندونو «ازادي مارچ» د پایته رسولو او پر ځای يې په ټول هېواد کې د حکومت ضد مظاهرو اعلان وکړ.

مولانا فضل الرحمن شېبه مخکې اسلام اباد کې د ازادي مارچ ګډونوالو ته د وينا پر مهال د احتجاجي ناستې د ختمولو اعلان وکړ او زياته يې کړه، چې تر دې وروسته به د اپوزيسيون ګوندونو غړي او پلويان د ټول هېواد په کچه په خپلو ښارونو کې د حکومت ضد لاريونونو ته دوام ورکوي.

مولانا زياته کړه، په هېڅ صورت د لومړي وزير عمران خان حکومت نه مني او تر هغو به خپلو مظاهرو او احتجاجي ناستو ته دوام وکړي، تر څو، چې عمران خان استعفا نه وي ورکړي.

د جمعيت علمای اسلام مشر له خپلو پلويانو او د اپوزيسيون ګوندونو له ټولو غړو مننه وکړه، چې شاوخوا دوه اونۍ يې د حکومت ضد احتجاجي ناسته کې زغم وکړ او هغوی ته يې وويل، چې نور بايد په منظمه توګه خپلو ښارونو ته ولاړ شي او هلته د حکومت پر ضد خپلو مظاهرو او احتجاجي ناستو ته دوام ورکړي.

مولانا فضل الرحمن نږدې دوه اونۍ وړاندې د کراچۍ له بندري ښار څخه تر اسلام آباده د لکونو پلویانو په بدرګه اسلام آباد ته خپل لاریون پیل او هلته دوه اونۍ دوام ورکړ.

مولانا د دې هېواد له لومړۍ وزیر څخه د استعفا غوښتنه کوي، او له دې غوښتنې څخه ځان اوخپل ملګري نه تیرېدونکي او خپله سره کرښه بولي.

بلې خوا بیا لومړي وزیر د مولانافضل الرحمن په مشرۍ د اپوزیسیون ګوندونو سره مذاکرات غواړي، غوښتنو ته یې دمنلو سینه ډبوي؛ خو له دندې لاس نه اخلي.

مولانا اوملګري یې ننني پلان ته د B پلان نوم ورکړی دی، او تاکید کوي چې هیڅکله به له خپلو غوښتنو تېر نه شي. دوی وایي، حکومت به اړ کوي تر څو له خپلې دندې لاس واخلي.