راپورتاژ: عبدالرحمن
د ملي يووالي حکومت دفاع وزارت وايي، چې له تيرو څو ورځو راهيسې ورته د داعش وسله والو د تسلمیدو لړۍ روانه ده چې تر دې دمه يې شمير ۶۱۵ کسانو ته ورسيد.
دفاع وزارت په تازه خپره کړې اعلاميه کې د ۱۸ داعش وسله والو د تسمليدو خبر ورکړی چې په وينا يې ۲۴ ښځې، ۳۱ ماشومان هم ورسره دي او خپلې پنځلس ميله وسلې يې ملي اردو ځواکونو ته وسپارلې.
اعلاميه کې راغلي، چې دغه وسله وال په اچين ولسوالۍ کې تسليم شوي او له تيرو دوو اوونيو راهيسې د هغوی د تسلميدو لړۍ روانه ده.
که څه هم دفاع وزارت ادعا کوي چې داعش وسله وال د دوی د پوځي عملیاتو د فشار له امله تسلميږي خو ځايي باوري سرچينې وايي، طالبانو چې په وروستيو کې يې د داعش پر خلاف کوم پريکنده عمليات پيل کړي په بريالۍ توګه روان دي او داعش وسله وال يې اچين کې د حکومت تر ولکې لاندې سيمو ته ورنږدې کړي دي.
ځايي اوسيدونکي او طالبان وايي، حکومت په سیمه کې هيڅ ډول عملیات نه دي کړي او داعش وسله وال د طالبانو له بريدونو او کلابندۍ څخه حکومت ته ځانونه سپاري.
تيره ورځ طالب وياند ذبیح الله مجاهد رسنيو ته په ليږلې خبرپاڼه کې ويلي و چې تيره ورځ د کابل حکومت پوځي او استخباراتي ادارې مسؤولینو د ننګرهار اچين ولسوالۍ مربوط د تختو سیمه کې د داعش هغه وروستۍ ډله هم وژغورله چې د طالبانو د بريدونو او کلابندۍ لاندې و.
طالبان وايي، چې امریکا او د حکومت استخبارات له داعش وسله والې ډلې سره همکاري کوي او هغوی ته د تسلميدو په نوم پنا ورکوي زياتوي ” د کابل ادارې لخوا له داعشي میلشو سره د خواخوږي په ترڅ کې په تيره یوه اونۍ کې ۵۴۲ تنه داعشي مسلح افراد او د هغوی د کورنیو غړي د کابل ادارې او په عموم کې د امریکايي اشغالګرو لخوا ژغورل شوي دي.”
طالبانو له تيرو شاوخوا دوو اوونيو راهيسې په ننګرهار کې د داعش پر خلاف عملیات پيل کړي چې تر دې دمه يې د شيرزادو، خوګياڼو، اګام ولسوالۍ ټولې سيمې ترې پاکې کړي او دا مهال د اچين ولسوالۍ په ډيره کمه سیمه کې پاتې دي چې سلګونه کسان يې د طالبانو د بریدونو له ويرې دولت ته تسلیم شوي دي.
طالبان وايي، د داعش پر وړاندې د حکومتي ارګانونو د عملیاتو ادعاوې حقيقت نه لري زياتوي: هغوی داعشي سیمو ته صرف د دې لپاره ورغلي وو چې په جګړه کې را ګير داعشیان او د هغوی د کورنیو غړي له مجاهدینو څخه روغ وژغوري او بیا بل وخت د هیواد په کومه بله برخه کې افزاري استفاده ترې وکړي.
د اچين ولسوالۍ یو اوسيدونکی مزارګل وايي، دولتي ځواکونو د داعش پر وړاندې تر اوسه هيڅ ډول عملیات نه دي کړي او یوازې هغه داعشي وسله وال ژغوري چې د طالبانو له خوا کلابند او یا تر بریدونو لاندې وي.
نوموړی زياتوي، حکومتي ځواکونو تر دې مخکې هم په سیمه کې د داعش خلاف هغه ډول عمليات نه کول چې څرنګه لازمه وه په خبره يې يوازې به په غرونو باندې د لویو توپونو ډزې کولې او یا به يې لوړې څوکې د هوايي بريدونو هدف ګرځولې چې هغوی ته د اوښتو زيانونو په اړه به يې د درواغو راپورونه خپرول.
د ايران، روسيې ځينو نورو هيوادونو له خوا امریکا او دولتي استخباراتي ادارې تورنې دي چې په افغانستان کې د داعش وسله والو ملاتړ او هغوی ته د پرمختګ زمينه برابروي.
تر دې مخکې په ننګرهار کې د مليشه ځواک مشر حاجي ظاهر او حضرت علي هم ويلی و چې دوی داسې ثبوتونه په لاس لري چې دولتي استخبارات او امریکا د داعش ډلې مرسته او ملاتړ کوي.
ډيری داسې پيښې هم شوي چې امریکايي بې پيلوټه او جيټ الوتکو د داعش پر وړاندې د طالبانو لومړۍ جنګي کرښې او آن د داعش ضد پاڅونوال بمبار کړي دي.
دا په داسې حال کې ده، چې پرون د جمعې په ورځ د ایران د بهرنيو چارو وزير جواد ظريف د “انډيا ټوډې” ورځپاڼې سره په خبرو کې ويلي چې امريکا په سيمه کې د داعش ډلې د ملاتړ هڅه کوي، په سوريې او عراق کې د دغې ډلې له شکست وروسته اوس پلان لري، چې دغه ډله افغانستان ته ولېږدوي.