(کابل ټکی کام، ۱۳۹۸ ليندۍ ۲، شنبه)
د افغانستان لپاره د امریکايي مرستو د څار اداره يا سيګار وايي، په وروستيو کې په افغان پوځ کې داخلي بريدونه زيات شوي چې له کبله يې د عسکرو په مرګ ژوبله کې هم زیاتوالی راغلی دی.
د سيګار په راپور کې راغلي، د روان کال په جون او اګست مياشت کې ۳۰ داخلي بريدنه ترسره شوي زیاتوي چې دغه شمېر د همدې کال د لومړيو درې مياشتو په پرتله داخلي بريدونه دوه برابره زيات شوي دي.
که څه هم سيګار په داخلي بریدونو کې د داخلي بريدونو له کبله افغان پوځ ته اوښتي تلفات نه دي خپاره کړي خو زياتوي چې په یادو دو مياشتو کې يې شپيته سلنه مرګ ژوبله زياته شوې او دغه راز د تير ۲۰۱۸م کال د همدې مودې په پرتله پکې دوه سلنه زياتوالی راغلی دی.
طالبانو په خپلو اعلاميو کې ويلي چې د افغان پوځ په ليکو کې يې لسګونه نفوذي کسان ځای پرځای کړي او له موقع څخه په استفادې به پر بهرنیو او دولتي ځواکونو، چارواکو او منسوبینو بريدونه کوي.
ډيری وخت طالبان په افغان پوځ کې د داخلي بريدونو مسؤوليت په غاړه اخلي چې په وروستي ځل يې د نومبر په نوولسمه ويلي و چې د فارياب مرکز ميمنې مربوط په ده سيدان سيمه کې په یوه نفوذي بريد کې د دولت دوه قوماندانان (بسم الله او نجيب الله قره) وژلي او بریدګر طالبانو ته ځان رسولی و.
طالبانو تير کال په یوه نفوذي بريد کې د کندهار امنيه قومندان جنرال رازق وواژه او د والي ويسا او په سیمه کې د امریکايي ځواکونو قومندان په شمول پکې ګڼ چارواکي ټپيان شول.
له یادې پيښې وروسته کله چې هم بهرني ځواکونه د دولتي ځواکونو پوځي مرکزونو ته ورځي نو ټول داخلي عسکر له دې ويرې بې وسلې کوي چې کوم نفوذي کس پرې برید ونه کړي.
