غورځنګ
تقريباً تېره اونۍ د لوګر ولايت د مرکز مربوط په څو ښوونځيو کې مدني فعالانو څو داسې پېښې رسنيزې کړې چې پکې د ښوونځيو هلکان د جنسي ځورونو له امله کړېږي او فرياد ورڅخه کوي، د ښوونځیو په دغو شاګردانو کې ځينې هلکانو ويل: چې د ښوونځي استادان يې جنسي ځورونې ته هڅوي او بيا ورته وايي چې که جنسي اړيکې راسره ونه نيسې نو په امتحان کې دې نه کاميابوم!
ان تر دې چې ځينو هلکانو په دې هم اعتراف کړی چې د جنسي اړيکو نيوونکو استادانو له لوري په مرګ هم ګواښل شوي دي.
د مدني فعال موسی محمودي په وينا د لوګر په ښوونځيو کې د جنسي ځورونې په ترڅ کې د ځينو هلکانو کورونه له سيمې څخه نورو سيمو ته کډه شوي او يا هم ځينې شاګردان او هلکان چې د ښوونکو له خوا ورسره جنسي اړيکې نيول شوې دي، د خپلو کورنيو له لوري له دې امله وژل شوي چې له رسوايۍ سره مخ نشي.
بل لور ته موسی محمودي هغه وخت د امنيت له لوري ونيول شو کله چې د اروپايي هېوادونو سفارت خانو ته د دې لپاره روان ؤ چې دغه ثبت شوي شکايات د دوی تر سفارت خانو ورسوي او پرې خبر يې کړي تر څو يې يا مخه ونيسي او د دغو شاګردانو غم وخوري.
که څه هم کابل اداره د بيان ازادۍ ته ځان ژمن بولي او د بيان ازادي د هر ولس حق بولي خو بيا هم د شنونکو پر باور دولت ورځ تر بلې د بيان د ازادۍ کړۍ د محدوديت لوري ته راکاږي. چې د دولت دغه ډول کار تر تنقيد لاندې نيول شوی او ان د کابل اداره چې د چا له لوري رامنځته شوې، هغوی هم دغه اداره په دغه ډول کړنو تورنوي او وايي چې د کابل ادارې دغه ډول کړنې د روسيې د استخباراتي کړۍ کې جي بي ريات کړنو ته ورته دي.
بل لور ته پخواني ولسمشر حامد کرزي هم د دولت دغه ډول کار تر تنقيد لاندې نيولی او وايي چې نړيواله ټولنه دې د دولت دغه ناروا کار ته جدي پاملرنه وکړي.
خو حکومت بيا د دغو کړنو په اړه بلکل غلی پاتې دی او هيڅ نه وايي که وايي هم نو بيا پکې خپل دريځ ستايي.
نو ځکه خو دلوګر اوسنۍ پېښه د تېرو پېښو په څېر د کابل پر اداره د تندي د داغ په څېر ده او دغه اداره يې نوره هم د رسوايۍ تر سرحده رسولې ده.
