(کابل ټکی کام، ۱۳۹۸ لیندۍ ۹، شنبه)
وروسته له هغې چې ټرمپ په افغانستان کې د امریکايي ځواکونو په تر ټولو سترې پوځي اډې بګرام کې طالبانو سره د مذاکراتو د ليدنو کتنو خبر ورکړ، د ناټو په شمول ځينو هيوادونو يې هرکلی کړی دی.
د ناټو عمومي منشي ينس سټولټنبرګ د بلجيم په پلازمينه بروکسل کې یوه کنفرانس ته د خبرو پر مهال، د افغانستان سولې مذاکراتو د بيا پیل هرکلی کړی، له طالبانو يې غوښتي چې دوی هم پر یوه باوري موافقه د سلاکېدو لپاره چمتووالی وښيي.
په عين حال کې د جرمني د بهرنيو چارو د وزارت مرستيال ویاند “رېرن برېيل” هم د طالبانو او امريکا له مذاکراتو هرکلی کړی وايي، هڅه يې دا ده چې په دغه برخه کې مرسته وکړي.
دغه راز د پاکستان د بهرنيو چارو وزير شاه محمود قريشي هم طالبانو سره د مذاکراتو د بيا پيل هرکلی کړی زياتوي د افغانسان مسئله یوازې له سياسي لارو د حل وړ ده چې د افغانستان او سيمې په ثبات کې مثبته ثابتيدلای شي.
قريشي په خپله ټويټرپاڼه ليکلي، چې پاکستان په سيمه او افغانستان کې د سولې او ثبات په راتګ کې هر ډول همکارۍ ته ژمن دی.
امریکا له طالبانو سره نهه پړاوه مذاکرات وکړل خو د امریکايي ولسشمر ټرمپ له خوا په څرګنده په دې بهانه لغوه اعلان شول چې ګواکې طالبانو په کابل کې د بريد پر مهال بهرنيانو ته مرګ ژوبله واړوله.
خو باوري سرچينې وايي، امریکا له طالبانو غوښتل چې د طالبانو او امريکايي استازو تر منځ تر منل شوې هوکړې ور اخوا نورې مادې هم ومني خو د طالبانو له خوا ونه منل شوې نو ځکه یو ځل بيا امریکا د مذاکراتو بيا پيل لپاره هلې ځلې پيل کړې.
رويټرز اژانس د ځينو باوري سرچينو په حواله خبر ورکړی چې تيره اوونۍ د امریکا لوړرتبه چارواکو د قطر په مرکز دوحه کې طالبانو سره د سولې موافقې په اړه خبرې کړي.
طالبان هم وايي، چې دوی خبرو ته تيار دي او په دريځ کې يې کوم بدلون نه دی راغلی بلکې که د سولې خبرې پيلېږي نو له هماغې نقطې به پيلېږي کوم ځای کې چې درېدلې وې.
