کابل ټکی کام (دوشنبه، ۱۱ ليندۍ، ۱۳۹۸ل)
نن دوشنبه د امریکا د هوا پېژندنې ادارې – ایر فیژول (air Visual) په خپل ويب سايټ یو تازه لسټ خپور کړی، چې د افغانستان پلازمېنه کابل پکې د نړۍ په کچه ترټولو د ککړې هوا لرونکی ښار ګڼل شوی دی.
د دغه راپور له مخې له کابل وروسته د پاکستان لاهور، د هند بمبي او د بنګلادیش ډاکه ښارونه په ترتيب د ډیرې ککړې هوا لرونکي ښارونه ګڼل شوي دي.
د ایر فیژول د خپور کړي راپور په غبرګون کې د افغانستان د چاپېریال ساتنې ادارې ویاندې لیلا ساماني رسنیو ته ویلي چې د امریکا د هوا پېژندنې ادارې خپور شوی راپور غلط او بې بنسټه دی.
د مېرمن ساماني په خبره : د هوا پېژندنې هره اداره خپل ځانګړي ماشینونه لري، چې د هوا د ککړتیا کچه څرګنده کړي؛ خو دغه امریکایې اداره لا تر اوسه په کابل کې ورته ماشین نه لري.
د يادونې وړ ده چې له دې وړاندې د هوا پېژندنې دې ادارې ادعا کړې وه چې د کابل (وزیر اکبر خان) سېمه کې يې د هوا پېژندلو ماشین لګولی؛ خو ميرمن ليلا يې دا خبره په کلکه ردوي.
