(کابل ټکی کام، ۱۳۹۸ ليندۍ ۲۰، چهارشنبه)
د پروان ولايت چارواکي وايي، چې د بګرام هوايي ډګر ته نږدې پر بهرنيو ځواکونو له دوو موټربم چاودنو وروسه وسله وال هوايي ډګر ته داخل شوي او جګړه روانه ده.
د بګرام ولسوال عبدالشکور قدوسي وايي، لومړ ميدان هوايي ته نږدې پر بهرنيو ځواکونو موټربم چاودنې وشوې چې په ترڅ کې يې د بګرام هوايي ډګر ديوال ویجاړ شوی او وسله وال توانيدلي چې د هوايي ډګر داخل ته ځانونه ورسوي.
د قدوسي په وينا، دا مهال د ميدان هوايي په داخل کې له بهرنيو ځواکونو سره د وسله والو نښتې روانې دي.
تر دې مخکې د پروان امنيه قومندان جنرال محمد محفوظ وليزاده ويلي و چې نن سهار د شپږ بجو په شاوخوا کې هوايي ډګر ته نږدې په جان قدم سيمه کې پر هغه بهرنيو ځواکونو موټربم بريد وشو چې په سيمه کې پر ګزمه بوخت و.
ځايي اوسيدونکي وايي، دواړه چاودنې ډيرې زوروې وې چې له تر ليرو ليرو سيمو يې اوازونه اوريدل شوي دي.
امنیتي سرچينې وايي، په موټربم بريدونو کې بهرنيو ځواکونو ته تلفات اوښتي خو په اړه يې لا کره معلومات نه دي تر لاسه شوي.
