کابل ټکی کام (چهارشنبه، ۲۰ ليندۍ، ۱۳۹۸ل
طالبانو د يوې خپر پاڼې په خپرلو سره د بګرام پر هوایي اډه د موټربم او وسله وال برید پړه پر غاړه اخیستې او ويلي يې دي چې په دې برید کې یې ګڼو امریکایي عسکرو ته مرګ ژوبله اړولې.
د طالبانو وياند ذبيح الله مجاهد د دې په تړاو رسنيو ته په لېږلې خپرپاڼه کې ويلي: ” د الفتح عملیاتو په ګړندي بهیر کې نن سهار شاوخوا شپږ بجې په هیواد کې د امریکايي اشغالګرو په لویه پوځي اډه (د بګرام په هوايي ډګر) ستر فدايي بریدونه ترسره شول.”
د نوموړي په خبره لومړی د منفجره موادو څخه ډک مازدا موټر د امریکايي عسکرو د قرارګاه له دیوال سره وجنګول شو، وروسته ګڼ شمیر جنګيالي، چې په سپکو او درنو وسلو، اور غورځونکو وسیلو، او انفجاري واسګټونو سمبال وو، وتوانیدل چې په بګرام کې د ننه د امریکايي عسکرو په خوب خونو او هستوګنځایونو بریدونه وکړل.
دغه راز طالب وياند په دې بريد کې د جومات يا روغتون ويجاړېدل او د ملکي وګړو تلفات رد کړل او په خبره يې داسې اوازې خپرول حقيقت نه لري، بلکې بريد کې لسګونه بهرنیو ځواکونو ته مرګ ژوبله اوښتې او جګړه لا هم روانه ده.
