غور: د دولتي ځواکونو عملیاتو له کبله څلويښت کورونه ويجاړ، اته سوه کورنۍ بې ځايه شوي
(کابل ټکی کام، ۱۳۹۸ ليندۍ ۲۷، چهارشنبه)
د غور ولايت د دولتيار ولسوالۍ ولسوال موسی کليم وايي، د دولتي ځواکونو د عملياتو له کبله اته سوه کورنۍ له خپلو سيمو بې ځايه شوي چې اوس په ډير بد حالت کې دي.
د ولسوال په وينا، دغه کورنۍ د يادې ولسوالۍ مربوط له سمک سيمې څخه له تيرو پنځو ورځو راهيسې بې ځايه شوي چې ځينې يې د ولسوالۍ مرکز او یو شمير نور يې شاوخوا سیمو ته تللي دي.
نوموړی زياتوي، دغه کورنۍ چې تعداد يې اته سوه ته رسيږي د دولتي ځواکونو د عملیاتو د وحشت له ويرې خپل کورونه پريښي او نورو سيمو ته کډه شوي دي.
د ولسوال په وينا، د ډير خلکو کورونه، لرګي او فصلونه سوځيدلي چې عاجلې مرستې ته اړتيا لري.
دغه راز د سیمې اوسيدونکي وايي، چې وړمه شپه يې پر کورونو جنګي الوتکو بمبار کړی چې له کبله يې څلويښت کورونه په بشپړه توګه ویجاړ شوي دي.
د ميرزاجان په نوم د دولتيار یو اوسيدونکی وايي، په دغه بمبارۍ کې ښځو او ماشومانو ته هم مرګ ژوبله اوښتې ده.
په عین حال کې د ولايتي شورا غړی عبدالحميد ناطقي وايي، که بې ځايه شويو خلکو سره بيړنۍ مرستې ونه شي نو د یخنۍ له کبله به يې د ډيرو تلفاتو شاهدان و اوسو.
