کابل ټکى کام (جمعه، ۲۹ لیندۍ ، ١٣٩٨ل)
واشنګټن ټایمز ورځپاڼې په یو تازه مطلب کې لیکلي، وروستیو افشا شویو اسنادو ټرمپ ته د سرتېرو د ایستلو ښه پلمه په لاس ورکړې ده.
دا ورځپاڼه په یاد مطلب کې زیاتوي، ټرمپ تر ولسمشرۍ مخکې په افغانستان کې د امریکايي ځواکونو او دغه جګړې مخالف و او اوس ددې غوښتونکی دی چې له دغه هېواد خپل سرتېري وباسي.
د سرچینې په خبره د واشنګټن پوسټ افشا کړو اسنادو دا په ډاګه کړه چې د سرتېرو پر ایستلو د ټرمپ ټینګار سم و او اوس تر بل هر وخت دې ته ښه پلمه برابره شوې چې امریکايي ځواکونه له افغانستان و ایستل شي.
سرچینه کاږي دمګړی امریکایي حکومت پر دې لګیا دی چې وکړی شي له افغانستان خپل ځواکونه وباسي او پر همدې پلانونو کار کوي.
واشنګټن پوسټ څو ورځو وړاندې داسې اسنادو ته له لاس موندې خبر ورکړ چې د افغان جګړې په اړه تیرو امریکایي حکومتونو خپل ولس ته دروغ ویلي دي، دې خبر دګڼو امریکایي چارواکو غبرګونونه راوپارول.
