کابل ټکى کام (چهار شنبه، ۴ مرغومی ، ١٣٩٨ل)
د ډیسي لوټر په نامه د امریکا د سیاستونو څارونکی او لیکوال وایي، امریکا پر هغې بې هدفه او بې مانا جګړې تر درې ټریلیونه ډېر لګښت وکړ چې پوهېدل ګټلی یې نشي.
هغه په خپله مقاله کې پر افغان جګړې شوي او کېدونکي لګښت ته په اشارې لیکلي، په دې جګړه کې له تېرو اتلسو کلونو راهیسي د زرګونه امریکایي او لکونه افغان پوځیانو په ګډون د ښځو او ماشومانو په شمول ګڼ ملکي افغانان قرباني شوي دي.
د لیکوال په وینا، د خپرو شویو اسنادو په اړه حیران دی، نه پوهېږي چې مشرانو ولې دروغ ویلي دي او ولي یې په میلیاردونو ډالر په دې بې مانا، ناپایه او ناکامه جګړه لګولي دي.
د لوټر په وینا، تر ټولو جالبه خو دا ده چې امریکایي کانګرس پرته له پوښتنې د ۲۰۲۰ میلادي کال لپاره ټاکل شوې نظامي بودجه چې د تېر کال په پرتله پکې ۲۲ میلیارده ډالر زیاتوالی راغلی دی تصویب کړې ده.
نوموړي د مقالې په وروستۍ برخه کې لیکلي، امریکایان باید کوڅه په کوڅه لاریون وکړي چې ولي یې قربانیو ته په سپکه کتل شوي دي، او دوی باید د دې جګړې د پایته رسولو غوښتنه وکړي.
نوموړی داسې مهال ورته څرګندونې کوي چې تیره میاشت واشنګټن پوسټ ورځپاڼې د افغان جګړې په اړه داسې اسناد رابرسیره کړل چې پکې ویل شوي وو امریکایي حکومتونو د افغان جګړې په اړه خپل ولس ته درواغ ویلي. دې اسنادو دګڼو امریکایي سیاستوالو غبرګونونه راپارولي دي.
