کابل ټکى کام (شنبه، ۷ مرغومی ، ١٣٩٨ل)
د ازبکستان د بهرنیو چارو وزیر عبدالعزیز کاملوف نن یکشنبه هیله څرګنده کړې چې د افغانستان د سولې په اړه روانې خبرې مثبتې پایلې ته رسېدونکې دي.
عبدالعزیز کاملوف چې پرون یې د ازبکستان په پلازمېنه تاشکند ښار کې په یوه خبري کنفرانس کې خبرې کولې، یو ځل یې بیا د افغانستان د سولې له بهیر سره د خپل هیواد پر ملاتړ ټینګار وکړ.
د روسیې انترفکس خبري اژانس د ښاغلي کاملوف له قوله راپور ورکړی چې وايي: “هیله لرم د افغانستان د سولې په اړه به زموږ هڅې بې پایلې نه پاته کېږي او همداراز غواړو چې هر څومره ژر وي د طالبانو او افغان حکومت تر منځ خبرې پیل شي.”
د کابل ادارې او طالبانو تر منځ د سولې د خبرو موضوع د دې ادارې له غوښتونو یوه ده چې په تکراري توګه یې ورباندې ټينګار کړی؛ خو طالبانو پر دې سربېره چې له امریکايي پلاوي سره یې لس ځلې خبرې کړي، له افغان حکومت سره يې د خبرو وړانديز رد کړی دی.
بلې خوا بیا ځینې غربي رسنیو ویلي چې وسلوالو طالبانو له اوږدو مشورو وروسته په لس ورځني اوربند توافق کړی دی، سرچینې زیاته کړې، دابه وکولی شي چې د باور فضا رامنځته کړي، او روانې خبرې برخلیک ټاکونکي پړاو ته ورسیږي.
