کابل ټکی کام (دوشنبه، ۹ مرغومی، ۱۳۹۸ل)
د ازادو رسنیو د ملاتړ د ادارې”نی” مشر “مجيب خلوتګر” وايي چې په روان کال کې په افغانستان کې ۱۰خبریالان وژل شوي، ۲۱ ټپیان شوي او د خبریالانو په وړاندې د تاوتریخوالي ۱۱۵قضیې ثبت شوي دي.
ښاغلي خلوتګر، چې نن يې په کابل کې يوې مطبوعاتي غونډې ته خبرې کولې، وويل:” د ۳۱خبریالانو د مرګژوبلې سربېره ۵۱قضیې د ګواښونو، ۱۰ قضیې د خبریالانو د لنډمهالي بند، ۸قضیې د تښتونې او ۳قضیې پر رسنیو بریدونه دي.”
د نوموړي په خبره سره له دې چې روان ۲۰۱۹م کال د رسنیو او خبریالانو لپاره خونړی و؛ خو بیا هم د خبریالانو او رسنیو په وړاندې د څلوېښت سلنه تاوتریخوالي د کموالي شاهدان یو. سږ کال د خبریالانو او د رسنیو د کارکوونکو په وړاندې د تاوتریخوالي ۱۱۵ قضیې ثبت شوي دي، لس يې قتلونه دي، چې د تېر کال په پرتله پنځوس سلنه کموالی ښيي.
نوموړي یو ځل بیا د کابل حکومت ملامت کړ، چې د خبریالانو په وړاندې د تاوتریخوالي په پېښو کې د تورنو کسانو ته سزا نه ورکوي او د اشرف غني، والیانو، وکیلانو ساتونکو، امنیه قومندانانو او پولیسو له لوري خبریالانو سره د تاوتریخوالي ډېرې پېښې شوي دي.
خلوتګر زیاتوي، چې په ۲۰۱۸ز کال کې ۲۰خبریالان وژل شوي وو؛ خو سږکال د خبریالانو په وژنه کې ۵۰سلنه کموالی راغلی دی.
” د خوښۍ ځای دی، چې سږکال د خبریالانو په وژنو کې د کموالي شاهدان یو؛ خو د بل پلوه په همدې روان زېږدیز کال کې د لسو تنو خبریالانو او کارکوونکو د وژل کېدو په اړه اندېښمن یو.”
د يادونې وړ ده چې د اشرف غني او عبدالله په پنځه کلنه ګډه واکمنۍ کې د خبریالانو په وړاندې د تاوتریخوالي ډېرې پېښې شوي چې د حامد کرزي په ټوله ۱۳کلنه واکمني کې دومره پېښې نه وې شوې.
