کابل ټکی کام (چهارشنبه، ۱۱ غبرګولی، ۱۴۰۱ل)
د اسلامي امارت په مشرۍ د افغان سرپرست حکومت د بهرنیو چارو وزیر ملا “امیرخان متقي” په کابل کې د ترکیې له سفیر جیهاد ارګین ای سره کتلي دي.
د بهرنیو چارو وزارت د معلوماتو له مخې، په دې لیدنه کې متقي ویلي چې افغانستان له ټولې نړۍ سره د دوه اړخیز درناوي پر بنسټ سالمې اړیکې غواړي او یو ځل بیا یې ټینګار کړی دی چې له افغان خاورې څخه به بهرنیو هېوادونو ته هیڅ ډول ګواښ پېښ نه شي.
په ورته مهال کابل کې د ترکیې سفیر “ارګین ای” ویلي، چې د دواړو هېوادونو اړیکې مثبت لور ته روانې دي او افغانستان سره به نه یوازې خپلو بشري مرستو ته دوام ورکړي، بلکې سوداګر به وهڅوي، چې په افغانستان کې پانګونه وکړي.
د سرچینو په خبره په دې لیدنه کې دغه راز دواړو لوریو د اړیکو پر پیاوړتیا، سیاسي موضوعاتو او د دوه اړخیزو همکاریو پر دوام ټینګار کړی دی.
