کابل ټکی کام (جمعه، ۴ چنګاښ، ۱۴۰۱ل)
د راپورونو له مخې ګونتنامو کې افغان بندي “اسدالله هارون” له زندان څخه خوشې او د قطر پلازمینه دوحه کې د اسلامي امارت مشرانو ته سپارل شوی دی.
د افغان حکومت مرکزي ویاند او د اطلاعاتو او فرهنګ وزارت مرستیال وزیر “ذبیح الله مجاهد” پر خپله ټویټر پاڼه لیکلي: چې د اسلامي امارت د هڅو او له امریکا سره د مخامخ او مثبت تعامل په پایله کې له ګوانتانامو زندانه یو افغان بندي “اسد الله هارون” خوشې شوی او اسلامي امارت ته سپارل شوی دی.
د ښاغلي مجاهد په خبره: چې د افغانستان اسلامي امارت په نورو هېوادونو کې دبندي شویو افغانانو راخوشې کول او دهغوی پوښتنه کول، خپله وجیبه ګڼي اوهڅه کوي چې هیڅ افغان هم په نورو هېوادونو کې د مظلومیت په حال کې پاتې نه شي او په خبره یې له ځینو نورو هېوادونو سره هم دافغان بندیانو د را خوشې کولو پر سرخبرې روانې دي.
باید وویل شي چې اسدالله هارون د افغانستان د حزب اسلامي ګوند غړیتوب درلود او کلونه وړاندې د القاعدې نړیوال جهادي غورځنګ سره د اړيکو لرلو په تور امریکایي استخباراتو نیولی و؛ خو تر پایه پرې لګیدلی تور ثابت نه شو.
