کابل ټکی کام (سه شنبه، ۱۸ زمری، ۱۴۰۱ل)
په داسې حال کې چې د فلسطین جهادي ډلو او اسرائیلي اشغالګرو ترمنځ د مصر په منځګړیتوب اوربند دوام لري؛ خو تازه د لوېدیځې غاړې له “نابلس” ښار څخه راپورونه وایي، چې د اسرائیلي اشغالګرو پوځیانو د اسلامي جهاد ډلې اړوند د “اقصی شهیدانو کڼدک” د یوه مهم قومندان “ابراهیم النابلسي” کور ته ورغلي او هغه یې شهید کړی.
سیمه ییزو سرچینو الجزیرې ته ویلي، چې پېښه نن سهار وختي رامنځته شوې او د اسرائیلي نیواکګرو او ابراهیم النابلسي ترمنځ نيږدې شل دقیقې نښته هم شوې ده؛ خو په پای کې د نوموړي مهمات خلاص شوي او نیواکګر یې کور ته ننوتلي او النابلسي یې په شهادت رسولی دی.
په ورته مهال د اسلامي جهاد غورځنګ د یوې اعلامیې په خپرولو سره د خپل پوځي قومندان وژل کېدل منلي، اسرائیل یې له اوربند څخه په سرغړونه تورن کړي او د غچ اخیستلو خبرداری یې ورکړی دی.
د ویلو ده چې څو ورځې وړاندې اسرائیلي نیواکګرو په غزې تړانګې د فلسطیني جهادي ډلو پر وړاندې عملیات پیل کړل، چې دوه ورځې یې دوام وکړ چې له امله یې د اسلامي جهاد غورځنګ د ځینو مهمو مشرانو په ګډون ۴۴ فلسطنیان شهیدان او د فلسطیني جهادیانو په توغندویي بریدونو کې لسګونه اسرایلیان هم مړه او ټپیان شوي وو؛ خو د مصر په منځګړیتوب اوربند رامنځته شو؛ خو د کتوونکو په باور نابلس کې د اسلامي جهاد د دې مهم مشر وژل کېدلو سره به دا اوربند دوام ونه کړي.
