کابل ټکی کام (سه شنبه، د وږي لومړۍ، ۱۴۰۱ل)
د ملګرو ملتونو د امنیت شورا غړي، چې اټکل کېده پرون شنبه به د طالب مشرانو پر سفرونو د بنديزونو د معافيت په تړاو يوې هوکړې ته سره ورسيږي، لا هم اختلاف لري او پرېکړه یې ځنډېدلې ده.
که څه هم د امنيت شورا غړو هېوادونو د پرون شپې غونډې جزيات لا رسنيز شوي نه دي خو د فرانسې د دولتي ټلويزيون خبر ورکړی، چې د امنيت شورا غړي پر طالب مشرانو د سفري محدوديتونو د معافيت په اړه د نظر ژور اختلاف لري.
د امنيت شورا غړي د دغه معافيت د تمديد په تړاو د نظر اختلاف لري، له همدې کبله يې په دې اړه پرېکړه له څو ځلې ناستو سره سره هم و نه کړای شوه.
دا په داسې حال کې ده چې د افغانستان د اسلامي امارت په مشرۍ افغان حکومت بيا ويلي، چې پر غړو يې د سفرونو بياځلي بنديز له نړۍ سره د دوی د واټن د رامنځته کېدو سبب کيږي او له نړیوالو یې غوښتنه کړې ده چې د بندیزونو له لارې دې په دوی فشارونه نه اچوي.
باید وویل شي چې د افغانستان د اسلامي امارت د ۱۳ غړو سفري محدوديتونه د سولې خبرو د بريالي کېدو لپاره په لنډمهالي ډول معاف شوي وو خو دا معافيت د شنبې په شپه پای ته ورسېد چې د امریکا په ګډون د امنیت شورا ځینې دایمي غړي هیوادونه پر طالب مشرانو د سفري بندیزونو د بیا ځلي لګولو غوښتوونکي دي خو روسیه او چین یې مخالفت کوي.
