کابل ټکی کام (پنجشنبه، ۱۰ وږی، ۱۴۰۱ل)
په بهرنیو چارو وزارت کې له زیانمن شوو سره د مرستو راغونډولو نړیوال کنفرانس تر سره شو.
په ياد کنفرانس کې د نړیوالو سازمانونو، مرستندویه بنسټونو، په کابل کې د مېشتو سفارتونو استازو او د اسلامي امارت په رهبرۍ د افغان سرپرست حکومت لوړ پوړو چارواکو ګډون کړی و.
په دغه غونډه کې پېښو ته د رسیدو په چارو کې د دولت وزارت مرستیال “مولوي شرف الدین مسلم” وویل، چې په دې ورستیو کې د هیواد په ۲۱ ولایتونو کې سیلابونه راووتل چې له امله یې ۱۳ ولایتونه ډیر زیانمن شوي چې تر بل هر وخت نړیوالو مرستو ته ډېره اړتیا لري.
نوموړي دغه راز له نړیوالي ټولنې او مرستدویه بنسټونو وغوښتل چې له افغانانو سره دې په دغه سخت وخت کې مرسته وکړي څو د خلکو ژوند بیرته عادي بڼې ته راوګرځي.
په غونډه کې د کډوالو چارو وزیر “خلیل الرحمن حقاني” په خپلو خبرو کې پر نړیوالو غږ وکړ چې له افغانستان سره خپلې مرستي د سیاسي موخو لپاره و نه ځنډوي، بلکي د نړیوالو مهاجرینو د حقونو پر اساس دې له دې هیواد سره مرستې وکړي.
نوموړي همدا راز زیاته کړه چې بهرني هیوادونه دې په اجباري توګه د افغانانو ایستل ودروي او له دوی سره دې ښه چلند وکړي.
باید وویل شي چې په دې وروسیتو کې په افغانستان کې د سختو سیلابونو او زلزلو له امله ۱۵۷۰ تنه مړه، ۵۸۴۲ ټپیان، ۱۸۷۲۶ کورنۍ بې ځایه ۱۶۰۰۰کورونه بشپړ ویجاړ او یو میلیون وګړي نور بیا سخت اغیزمن شوي چې د نړیوالو مرستو ته جدي اړتیا لري.
