کابل ټکی کام (شنبه، ۲ تله، ۱۴۰۱ل)
وروسته تر هغه چې د اخلاقي امنیت پولیسو لخوا ایران کې د مهسا په نوم د یوې ځوانې نجلۍ تر مړینې وروسته خلکو پراخ لاریونونه پيل کړل، تر اوسه د ایران امنیتي ځواکونو لږ تر لږه ۵۰ تنه لاریون کوونکي وژلي دي.
د ایران د بشري حقونو ادارې ویلي چې شپږ تنه د ګیلان په ولایت کې وروسته تر هغه ووژل شول چې امنیتي ځواکونو په سیمه کې اور بل کړ.
دې ادارې همدارنګه ویلي چې د ایران د بابول او آمول په ښارونو کې هم څو تنه وژل شوي.
په راپور کې ویل شوي چې د ایران په شاوخوا ۸۰ ښارونو او ښارګوټو کې خلکو لاریونونه پيل کړي دي.
د دې ادرې مشر محمود امیري مقدم ویلي چې لږ تر لږه پنځوس تنه تر اوسه وژل شوي او خلک لا هم د خپلو اساسي حقونو او حیثیت لپاره مظاهرې کوي.
خو د ایران حکومت د دومره ډېرو کسانو وژنه نه تاییدوي او یوازې د ۱۷ مظاهره چیانو او پنځو امنیتي ځواکونو د وژل کېدو پخلی کوي.
