کابل ټکی کام (سه شنبه، ۲۴ لړم، ۱۴۰۱ل)
افغان حکومت سپین بولدک کې په رامنځته شوې پېښه د خواشیني څرګنده کړې او په خبره یې د عاملینو د پیدا کولو لپاره یې هڅې روانې دي.
د اسلامي امارت په رهبرۍ د افغان حکومت مرکزي ویاند “ذبیح الله مجاهد” پر خپله ټويټر پاڼه لیکلي: د روان 2022/11/13م نیټه د کندهار ولایت له سپین بولدک څخه چمن ته په ورتلونکي لاره د نامعلوم کس له لوري په پاکستاني امنیتي کسانو ډزي شوې دي چې له امله یې یوتن پاکستانی عسکر وژل شوی، د افغانستان اسلامي امارت په یاده پیښه خواشیني څرګندوي او د پیښې د څیړلو او عاملینو د پیدا کولو لپاره یو لوړ پوړی هیئت ګومارل شوی او پلټني یې پیل کړې دي.
مجاهد دغه راز ویلي، چې اسلامي امارت امنیتي ارګانونه کوښښ کوي چې د بیا لپاره د داډول پیښو مخنيوي ته جدي پاملرنه وکړي.
د ویلو ده چې دوه ورځې وړاندې د کندهار ولایت د سپین بولدک ولسوالۍ اړوند په پاک- افغان پوله یو نا څرګند وسله وال په پاکستاني امنیتي ځواکونو ډزې وکړې، چې له امله یې یو پاکستاني پوله ساتونکی عسکر ووژل شو او په غبرګون کې یې پاکستان دغه پوله د تلوونکو او را تلوونکو کسانو پر مخ وتړله له سپین بولدک څخه ځینو کسانو کابل ټکی کام ته ویلي، چې پوله لا هم تړلې ده چې له امله یې سلګونه کسان دواړو لوریو ته بند پاتې دي.
