کابل ټکی کام (پنجشنبه، ۲۴ وری، ۱۴۰۲ل)
د افغانستان د بهرنیو چارو وزارت وياند حافظ ضيا احمد وايي، د بهرنيو چارو د وزیر ښاغلي امير خان متقي په مشرۍ افغان پلاوی د بهرنیو چارو وزیرانو په ناسته کې د ګډون په موخه ازبکستان ته روان شو.
نوموړي څو شيبې وړاندې په خپل رسمي ټويټر اکاونټ د ياد پلاوي د انځور خپرولو ترڅنګ ليکلي، چې (د ا. ا. ا. د بهرنيو چارو وزير محترم مولوي امیر خان متقي په مشرۍ د افغانستان پلاوی د ازبکستان په سمرقند کې د افغانستان د ګاونډيو هېوادونو د بهرنیو چارو وزیرانو په ناسته کې د ګډون په موخه دغه هېواد ته روان شو.)
د ښاغلي ضيا احمد په وينا، په پام کې ده چې د بهرنيو چارو وزير ښاغلی متقي به د ناستې په څنډو کې د سيمې د ځينو هېوادونو د بهرنیو چارو وزيرانو سره دوې اړخيزې ناستې هم ولري.
دا په سمرقند کې څلورمه ناسته ده چې د افغانستان د ګاونډیانو «چین، ازبکستان، پاکستان، ایران، ترکمنستان او تاجکستان» ترڅنګ د روسیې د بهرنیو چارو وزیرانو ترمنځ دائرېدونکې ده او پکې به د سیمې د امنیت او ثبات ترڅنګ د افغانستان په اړه د سیمې د هیوادونو د اجماع پر تقویت هم خبرې وشي.
