کابل ټکی کام (پنجشنبه، ۷ ثور، ۱۴۰۲ل)
د اسلامي امارت په راتګ سره ټول پخواني چارواکي او تش په نامه سياسيون اروپايي او نورو هېوادونو ته لاړل او افغانستان يې پرېښود. له هېواده وتلي دغه پخوانی فاسدې څېرې دا ځل د اتريش په ويانا ښار کې سره راټولې شوي او د يو شخصي څېړنيز مرکز ودانۍ کې يې ناسته جوړه کړې . د سياسي چارو يو شمېر تحليل کوونکي وايي: دغه ناسته غير رسمي ده او ګډونوال يې د کوم هېواد او يا هم د کوم رسمي سازمان له لوري نه دي بلل شوي.دوی په دې باور دي،چې دغه ډول ناستې د افغانستان پر روان وضعيت هېڅ ډول اغيزه نه شي کولی او نه هم له دغې ناستې کومه هېله مندي کيدای شي.د سياسي چارو تحليل کوونکي سرور نيازی وايي: (( د ويانا غونډه يوه غير رسمي غونډه ده،چې د هېڅ نړيوال سازمان او هېواد له لوري نه ده رابلل شوې. دا د افغانستان پر وضعيت هېڅ ډول اثر نه شي لرلي او نه هم ورته کومه هېله مندي شته.))ځينې نور بيا وايي: د ويانا په ناسته کې تکراري او افغانانو ته تجربه شوې څيرې راټولې شوي او ناسته يې کومه پايله نه ورکوي.د سياسي چارو تحليل کوونکي قريب الرحمان شهاب وايي: ((زه فکر کوم،چې دغه ناسته به هېڅ ګټه ونه لري او دا هغه تکراري څيرې دي،چې دلته راټولې شوي او پخوا افغانانو تجربه کړي او له ناستې يې هېڅ تمه نه شي کيدای.))
