کابل ټکی کام (پنجشنبه، ۱۲ جوزا، ۱۴۰۲ل)
افغانستان او ترکمنستان د ترانزېټ کارګو ترانسپورټ په برخه کې د همکاریو پر پراختیا خبرې کړې دي. د صنایعو او سوداګرۍ وزارت وايي، سرپرست حکومت له ترکمنستان څخه غوښتي چې د دغه هېواد د سوداګریزو توکو د لېږد او رالېږد لګښتونه راکم کړي. د دغه وزارت ویاند زیاتوي چې ترکمنستاني چارواکو د دواړو هېوادونو تر منځ د سوداګرۍ د ښه والي او د توکو د لېږد رالېږد د لګښت د کمولو لپاره د یوې ګډې کمېټې پر جوړولو هوکړه کړې ده. تر دې وړاندې د صنعت او سوداګرۍ وزارت سرپرست د ترکمنستان د ترانسپورت له وزیر سره په کتنه کې د ترانزیټي ستونزو د هواري لپاره د یوې ګډې کمېټې پر جوړېدو خبرې کړې دي.
