کابل ټکی کام (سه شنبه، ۲۳ جوزا، ۱۴۰۲ل)
په اکوادور کې یوه ښځه د هغې د مرګ له اعلان پنځه ساعته وروسته په تابوت کې داسې مهال ژوندۍ شوه چې خپلوان یې په خښولو بوخت وو.
دې ښځې د خاورو ته سپارلو پر وخت د تابوت تخته ټکولې او خپلوان یې متوجه کړي چې مړه نه، بلکې ژوندۍ ده.
د «بلا مونتویا» په نامه دا ۷۶ کلنه ښځه اوس په هغه روغتون کې تر درملنې لاندې ده چې دا یې مړه اعلان کړې وه.
بلخوا د مونتویا زوی «ګیلبرت بالبران ویلي چې مور یې د مړینې له اعلان پنځه ساعته وروسته په تابوت کې لاسونه وخوځول او اوس د اکسیجن اخیستلو لپاره په روغتون کې بستر ده.
ویل کېږي، دا ښځه د مغزيسکتې له امله مارتین ایکازا روغتون ته وړل شوې وه او ډاکترانو مړه اعلان کړې وه.
په ورته وخت کې د دغه هېواد روغتیا وزارت د دې پېښې د پلټنې او د مونتویا د روغتیاپالنې لپاره د یو پلاوي د ټاکلو خبر ورکړی دی.
