کابل ټکی کام (چهارشنبه، ۲۴ جوزا، ۱۴۰۲ل)
دا غونډه تېره ورځ ناوخته د ناروې هېواد په پلازمینه اسلو کې پیل شوه چې په کې به د افغانستان، منځني ختیځ او اسیا، کولمبیا، ایتوپیا، یمن، سومالیا، سوډان، اوکراین او همدارنګه د یو شمېر نورو هېوادونو د شخړو او پرمختګونو په اړه خبرې وشي.
د ناروې د بهرنیو چارو وزارت د معلوماتو له مخې، په دې ناسته کې د افغانستان استازي، په بشردوستانه چارو کې د ملګرو ملتونو د سرمنشي ځانګړی استازی “مارټین ګریفټس”، د کولمبیا د بهرنیو چارو وزیر، د اندونیزیا د بهرنیو چارو وزیر، د نړیوالې محکمې لوی څارنوال، د کانګو ډیموکراټیک جمهوریت غړي، د افریقا، جنوبي سوډان او ګڼو نورو هېوادونو استازي برخه لري.
ویل کېږي چې په یاده ناسته کې به تر ډېره په بشري برخه او د ښځو او نجونو د کار او زده کړو د حقونو ورکولو په اړه له نړیوالو سره د اسلامي امارت د کړو ژمنو د عملي کېدو په اړه بحثونه وشي.
بل لورته یو شمېر سرچینو خبر ورکړی چې یادې ناستې ته د اسلامي امارت درې غړي ورغلي، چې شمس الدین منصور، عبدالقهار بلخې او روح الله عمر په کې شامل دي.
دا غونډه چې د بندو دروازو ترشاه پیل شوې، لا یې هم په اړه پوره جزیات نه دي رسنیز شوي.
