سوډان؛ پر پلازمینه خرطوم د ناڅرګندو الوتکو بمبار لسګونو کسانو ته مرګ ژوبله اړولې
کابل ټکی کام (دوشنبه، ۲۶ چنګاښ، ۱۴۰۲ل)
په داسې حال کې چې د سوډان په لر او بر کې د سوډاني پوځ او د چټک غبرګون د یاغي شوې ملیشې ترمنځ خونړۍ نښتې روانې دي له دغه هېواد څخه وروستي راپورونه وایي، چې پر پلازمینه خرطوم کې د سوډاني پوځ په مرکزي قوماندانۍ، مرکزونو او ملکي سیمو د ناڅرګندو الوتکو په بمبار کې ګڼ شمېر کسانو ته مرګ ژوبله اوښتې ده.
د سوډاني پوځ ویاند د چټک غبرګون په یاغي ځواکونو تور لګولی، چې د بهرنیو هیوادونو په اشاره د سوډان د ویشلو هڅه کوي او ځینې هیوادونه اوس په څرګند ډول د سوډان د حکومت پر وړاندې د یاغیانو ملاتړ کوي.
که څه هم نوموړي د مرګ ژوبلې د کره شمېر په اړه څه نه دي ویلي او نه یې د کوم هیواد نوم اخیستئ؛ خو د منځني ختیځ د چارو یو شمېر کار پوهان په دې اند دي، چې ښایي وروستي بریدونه اسرائیلو کړي وي ترڅو د البرهان په مشرۍ د سوډان په پوځي حکومت هغه څه ومني چې سوډان یې تل له منلو انکار کړی دی.
د ویلو ده چې په سوډان کې د روان کال د اپریل میاشتې په ۱۵ مه نېټه د سوډانې پوځ او د چټک غبرګون د ځواکونو ترمنځ د واک پر سر خونړۍ نښتې پیل شوي چې تر اوسه پکې ۳۵۰۰ کسان وژل شوي، زرګونه نور ټپیان شوي او میلیونونه ګاونډیو هیوادونو ته تښتیدلي دي.
