کابل ټکی کام (پنجشنبه، ۲۳ وږی، ۱۴۰۲ل)
د خوړو نړيوالې ادارې يا ډبليواف پي ويلي، چې د افغانستان بېړنۍ بشري مرستې کمې شوي او خبرداری ورکړی چې دغه اداره په دې هېواد کې يواځې له پنځو اړمنو کسانو یوه ته اړینې مرستې رسولی شي.
افغانستان کې د دغه بنسټ مشره شا وي لي وايي، دوی پخوا د ۱۳ میلیونه کسانو لاسنیوی کاوه خو اوس یوازې درې میلیونه خلکو ته د مرستې رسولو بوديجه لري.
د خوړو نړیوالې ادارې بروکسل کې د اروپايي ټولنې په کوربتوب جوړه شوې یوه غونډه کې پر نړیوالو غږ وکړ چې د افغانستان بېوزلو ته دې بېړنۍ مرستې برابرې کړي.
(ډبلیو اېف پي) وايي د راتلونکو شپږو میاشتو په اوږدو کې افغانستان د اړمنو د لاسنیوي لپاره یو میلیارد ډالرو ته اړتیا لري.
د خوړو نړیوال پروګرام د ملګرو ملتونو اړونده اداره ده چې له څو لسیزو راهیسې له افغانانو سره د مرستو رسولو تر ټولو لوی بهیر پر مخ وړي.
دا پروګرام له نورو هېوادونو او بسپنه ورکوونکو مالي مرسته ترلاسه کوي او بېوزلو ته یې رسوي.
